भिगवण: बारामती-भिगवण रस्त्यावर अज्ञात वाहनाने दुचाकीला जोरदार धडक दिल्याची घटना घडली आहे. ही घटना पिंपळे (ता. इंदापूर) ग्रामपंचायत हद्दीतील पदमावती पेट्रोलपंपाच्या जवळ शुक्रवारी (ता.१२) सकाळी सात वाजण्याच्या सुमारास घडली. या अपघातात दुचाकीस्वाराचा जागीच मृत्यू झाला आहे.
विशाल कैलाश धवडे (वय 41 रा. भिगवण मेनपेठ, दुर्गादेवी मंदीर परिसर ता. इंदापूर, जि. पुणे) असे मृत्यू झालेल्याचे नाव आहे. याप्रकरणी अमरनाथ भगवान धवडे (वय 41) यांनी भिगवण पोलीस ठाण्यात फिर्याद दिली आहे. त्यानुसार अज्ञात चालकाच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी अमरनाथ धवडे व विशाल धवडे हे नात्याने दोघे एकमेकांचे चुलत भाऊ आहेत. विशाल धवडे हे काम संपवून बारामती-भिगवण रस्त्यावरून शुक्रवारी (ता.१२) सकाळी घरी निघाले होते. दरम्यान, त्यांची गाडी पदमावती पेट्रोल पंपाजवळ आली असता, अज्ञात वाहन चालकाने विशाल धवडे यांच्या दुचाकीला जोरदार धडक दिली. त्यानंतर अज्ञात वाहन चालक निघून गेला.
दरम्यान, या अपघातात विशाल धवडे हे गंभीर जखमी होऊन त्यांचा मृत्यू झाला. याप्रकरणी त्यांचा भाऊ अमरनाथ धवडे यांनी भिगवण पोलीस ठाण्यात फिर्याद दिली. त्यानुसार अज्ञात चालकाच्या विरोधात गुन्हा दाखल करण्यात आला आहे. पुढील तपास भिगवण पोलीस ठाण्याचे पोलीस उपनिरीक्षक खाडे करीत आहेत.
