भंडारा : काँग्रेसचे प्रदेशाध्यक्ष आमदार नाना पटोले यांच्या गाडीचा भीषण अपघात झाला आहे. प्रचार करून माघारी परतत असताना ट्रकने त्यांच्या गाडीला मागून धडक दिली. या अपघातामध्ये आमदार नाना पटोले हे अगदी थोडक्यात बचावले आहेत. भंडाऱ्यापासून जवळ असलेल्या भीलवाडा गावाजवळ ही घटना घडली आहे. मंगळवार ९ एप्रिल रोजी रात्रीच्या सुमारास प्रचार आटपून सुकळी या गावी जात असताना मागून येणाऱ्या ट्रकने पटोले गाडीला जोरात धडक दिली. या अपघातामध्ये गाडीचे मोठं नुकसान झाले असून असून आमदार नाना पटोले हे थोडक्यात बचावले आहेत.
नाना पटोले हे महाविकास आघाडीचे भंडारा-गोंदियाचे उमेदवार प्रशांत पडोळे यांचा प्रचार आटपून रात्रीच्या सुमारास माघारी परतत असताना भिलेवाडा गावाजवळ त्यांच्या ताफ्याला भरधाव ट्रकने जोरदार धडक दिली. आमदार नाना पटोले हे ज्या गाडीत बसले होते, त्या गाडीच्या मागच्या भागाचा अक्षरशः चक्काचूर झाला आहे. मात्र, सुदैवाने या अपघातामध्ये नाना पटोले यांच्यासह गाडीतील इतर कोणालाही कोणतीही दुखापत झालेली नसून सर्व जण सुरक्षीत आहेत.
त्यानंतर नाना पटोले यांनी या अपघाताची माहिती पोलिसांना दिली. पोलिसांकडून या अपघाताबाबत अधिक तपास सुरू करण्यात आला आहे. या अपघाताचे नेमकं कारण अद्याप समोर आलेले नाही. परंतु, ट्रकच्या चालकाचे नित्रंयण सुटल्याने हा अपघात झाला, असावा असा प्राथमिक अंदाज आहे.
