उरुळी कांचन, (पुणे) : उरुळी कांचनजवळ असलेल्या शिंदवणे (ता. हवेली) घाटाच्या पायथ्याशी चारचाकी व दुचाकी यांची समोरासमोर जोरदार धडक झाल्याची घटना नुकतीच उघडकीस आली. बुधवारी (ता. २७) रात्री आठ वाजण्याच्या सुमारास ही घटना घडली. या अपघातात दुचाकीस्वार गंभीर जखमी झाला आहे.
कैलास अर्जुन महाडिक (वय ५८, शिंदवणे, ता. हवेली) असे अपघातात जखमी झालेल्या व्यक्तीचे नाव आहे. मिळालेल्या माहितीनुसार, कैलास महाडिक हे शिंदवणे येथून त्यांच्या दुचाकीवरून जेजुरी मार्गाकडे घाटातून निघाले होते. त्याचवेळी घाटातून एक चारचाकी गाडी ही उरुळी कांचनच्या बाजूने निघाली होती. यावेळी दुचाकी व चारचाकी या दोन्ही वाहनांचा अपघात झाला.
दरम्यान, हा अपघात कसा झाला याची माहिती अद्याप मिळू शकली नसून जखमी कैलास महाडिक यांना उरुळी कांचन येथील एका रुग्णालयात दाखल करण्यात आले आहे. त्यांच्यावर पुढील उपचार सुरु आहेत.
