पिंपरी : आगामी लोकसभा निवडणुका भयमुक्त, पारदर्शक आणि निःपक्षपातीपणे पार पाडण्यासाठी पिंपरी-चिंचवड शहरातील सराईत गुन्हेगारांवर कारवाई करण्यात आली आहे. शहरातील दोन सराईत गुन्हेगारांच्या टोळ्यांवर पोलीस आयुक्त विनय कुमार चौबे यांनी महाराष्ट्र संघटित गुन्हेगारी नियंत्रण कायद्यान्वये (मोक्का) कायद्यांतर्गत कारवाई केली आहे.
भोसरी पोलीस ठाण्याच्या हद्दीतील पवन उजागरे याच्यासह तीन जणांवर मोक्का कारवाई करण्यात आली आहे. टोळी प्रमुख पवन छगन उजागरे (रा. भोसरी), सुनिल जनार्दन सकट (वय-32 रा. लांडेवाडी, भोसरी), दिपक रामकिसन हजारे (वय-27 रा. लांडेवाडी, भोसरी) यांच्यावर मोक्का कारवाई करण्यात आली आहे. आरोपींवर ६ गंभीर गुन्हे दाखल आहेत.
वाकड पोलीस ठाण्याच्या हद्दीतील आदित्य उर्फ निरंजन आहिरराव याच्यासह ४ जणांवर मोक्का कायद्यांतर्गत कारवाई केली आहे. आदित्य उर्फ निरंजन शाम आहिरराव (वय-31 रा. तापकीरनगर, काळेवाडी, पुणे), प्रतिक अशोक माने (वय-20 रा. थेरगाव, पुणे), प्रेम संदीप तरडे (वय-19 रा. काळेवाडी, पुणे) यांच्यावर कारवाई करण्यात आली आहे. टोळी प्रमुख व त्याचे साथीदार यांच्यावर १० गंभीर गुन्हे दाखल आहेत.
या दोन्ही टोळ्यांमधील आरोपींनी संघटित गुन्हेगारी टोळी बनवुन वर्चस्वासाठी आणि आर्थिक फायद्यासाठी संघटितपणे गुन्हे केल्याचे तपासात निष्पन्न झाले आहे. त्यांच्या विरोधात महाराष्ट्र संघटीत गुन्हेगारी नियंत्रण कायदा 1999 चे कलम 3 (1)(ii), 3(2), 3(4) चा अंतर्भाव करण्याचा प्रस्ताव अपर पोलीस आयुक्त वसंत परदेशी यांच्याकडे सादर करण्यात आला होता. त्या कागदपत्रांची पडताळणी करुन त्यांनी मोक्का गुन्ह्याचा अंतर्भाव करण्यास मान्यता देण्यात आली आहे.
