कोल्हापूर : काँक्रिट मिक्सर मशीन लावत असताना मजुरांना ट्रकने उडविल्याने भीषण अपघात झाला आहे. या अपघातात चार जण ठार तर आठ जण गंभीर जखमी झाले आहेत. हा अपघात रात्री आठ वाजण्याच्या सुमारास हातकणंगलेमधील वाठार येथील पुलाजवळ घडला.
भादोले येथील रियाज कन्स्ट्रक्शन या स्लॅब टाकणाऱ्या कॉन्ट्रॅक्टरच्या मजुरांची टोळी शिये येथून आपले काम संपवून टेम्पोमधून भादोलेकडे निघाले होते. याच टेम्पोला पाठीमागे मिक्सर मशीन देखील जोडले होते. त्यानंतर सर्वजण वाठार येथे सेवा रस्त्यावर आले. त्या ठिकाणी सकाळी अजून एक काँक्रीटचे काम बाकी असल्याने टेम्पोच्या पाठीमागील मिक्सर मशीन सोडवून ते लावण्यासाठी सर्व मजूर खाली उतरले. हे मशीन सोडवून लावत असतानाच कोल्हापूरच्या बाजूने भरधाव वेगाने आलेल्या ट्रकने या सर्व मजुरांना उडविले. या अपघातात सचिन धनवडे (रा.भादोले) हा जागीच ठार झाला. तर अकराजण गंभीर जखमी झाले आहेत. यात दोन महिलांचा समावेश आहे. या सर्व जखमींना कोल्हापूर येथील शासकीय रुग्णालयात उपचारासाठी दाखल करण्यात आले. त्या ठिकाणी अन्य तिघांचा मृत्यू झाल्याची माहिती मिळत आहे.
