मुंबई: सोशल मीडिया इन्‍फ्लूएंसर आणि वाइल्डकार्ड एंट्री घेतलेल्या मनीषा राणीने ‘झलक दिखला जा’ सीझन 11 ची ट्रॉफी जिंकली आहे. शनिवारी 2 मार्चच्या रात्री मनीषाला या सेलिब्रिटी डान्स रिॲलिटी शोच्या विजेत्याचा मुकुट देण्यात आला. ‘झलक दिखला जा’च्या इतिहासात हा सन्मान मिळवणारी ती पहिली वाइल्डकार्ड स्पर्धक आहे.
ट्रॉफीशिवाय मनीषाला 30 लाख रुपयांचा धनादेश मिळाला, तर तिचे कोरिओग्राफर आशुतोष पवार यांना 10 लाख रुपये मिळाले. दोघांनीही ‘यास आयलंड (अबू धाबी)’च्या टूरची तिकिटे जिंकली. फिनालेमध्ये ‘मर्डर मुबारक’चे कलाकार सारा अली खान, विजय वर्मा आणि संजय कपूर उपस्थित होते, जे स्पर्धकांसोबत नृत्यामध्ये स्टेजवर सामील झाले.
मनीषाचे शेवटचे सादरीकरण ‘ठुमकेश्वरी’, ‘डू यू लव्ह मी’, ‘परम सुंदरी’ आणि ‘सामी सामी’ या ट्रॅकवर होते. शाहरुख खानच्या ‘जवान’ चित्रपटातील ‘जिंदा बंदा’ या गाण्यावर शोएबने दमदार परफॉर्मन्स दिला. यानंतर त्याने 1999 मध्ये अब्बास-मस्तानच्या ‘बादशाह’ चित्रपटात शाहरुख खान आणि ट्विंकल खन्ना यांच्यावर चित्रित केलेले ‘बादशाह ओ बादशाह’ हे गाणे गायले. अद्रिजाने ‘छमक चलो’, ‘नदिया के पार’ आणि ‘मूव्ह युवर बॉडी’ या गाण्यांवर नृत्यदिग्दर्शित केलेल्या नृत्याने सर्वांची मने जिंकली.
काय म्हणाली शोची विजेती मनीषा?
कोविड लॉकडाऊन दरम्यान इंस्टाग्राम नंतर टिकटॉकवर तिच्या डान्स आणि रील्सने मनीषा प्रसिद्ध झाली. मनीषाने याआधी ‘बिग बॉस ओटीटी 2’ मध्ये सेकंड रनर अपचा पुरस्कार जिंकला होता.
मनीषाने तिचे कोरिओग्राफर आशुतोष यांच्याबद्दल कृतज्ञता व्यक्त करताना म्हटले की, “तो खूप समजूतदार आहे आणि प्रत्येक आठवड्यात, तो मला माझी क्षितिजे विस्तृत करण्यासाठी आणि माझ्या नृत्य क्षमतेचे नवीन पैलू शोधण्यासाठी प्रेरित करतो. हा विजय फक्त माझा नाही. “हे प्रत्येकासाठी आहे, ज्यांनी यावर विश्वास ठेवला आहे. मला आधार दिला.”
