पनवेल : बैलगाडा शर्यत शौकिन, गोल्डन मॅन पंढरीशेठ फडके यांचे अल्पशा आजाराने निधन झाले आहे. आपल्या ऑफिसवरून घरी जात असताना कारमध्येच त्यांना हृदयविकाराचा झटका आला. त्यातच त्यांचा मृत्यू झाला. पंढरीशेठ यांच्या निधनाने पनवेलच्या विहिगर येथील परिसरावर शोककळा पसरली आहे. बैलगाडा शर्यत प्रेमींसाठी हा मोठा धक्का मानला जात आहे.
मुळचे पनवेल येथील असलेले पंढरीशेठ फडके हे बैलगाडा शर्यत शौकिन म्हणून ओळखले जात होते. अंगावर किलोभर सोने, मध्यम शरीरयष्टी, भेदक नजर… अशी पंढरी फडके यांची ओळख होती. फडके हे आधी शेकाप पक्षात सक्रिय होते. त्यानंतर त्यांनी भारतीय जनता पक्षामध्ये प्रवेश केला. १९८६ सालापासून वडिलांमुळे फडकेंना बैलगाडा शर्यतीची आवड निर्माण झाली.
बैलगाडा शर्यतीच्या मैदानात त्यांनी घेतलेली हटके एन्ट्री ही नेहमीच चर्चेत असे. त्यांच्या सोन्याची आणि गाडीच्या टपावर बसून शर्यत बघण्याच्या आगळ्या स्टाईलची सतत चर्चा होत असे. बैल नजरेत बसला की कितीही पैसे लागू द्या, त्याला विकत घेणारा ‘बैल’मालक म्हणून पंढरीशेठ यांची ओळख होती. परिसरात फडके यांच्या नावाचा दबदबा होता. फडके यांच्या अचानक जाण्याने परिसरात शोककळा पसरली आहे.
