परंडा : करमाळा रस्त्याजवळील काशीमबाग वस्तीवर घराबाहेर झोपलेले शेतकरी रामा अभिमान भानवसे-माळी (वय ५०) यांच्यावर अज्ञात चोरट्यांनी गुरुवारी (ता. १५) पहाटे ३ वाजण्याच्या सुमारास धारदार शस्त्राने हल्ला करून, डोक्यात घाव घालून, जीवघेणा हल्ला केला. घराबाहेर वाळत टाकलेल्या गव्हाच्या राखणीसाठी ते पलंगावर झोपले होते. या वेळी झोपेतच त्यांच्यावर हा हल्ला झाला. या दरम्यान, शेजारील ऊसतोड कामगार टोळीच्या कोपीचा कपडा कापून अंदाजे दहा हजार रुपये किंमतीचा मोबाईल चोरट्यांनी चोरून नेल्याची घटना देखील उघडकीला आली आहे.
अधिक माहितीनुसार, चोरटे हल्ला करून निघून गेल्यानंतर त्यांनी घरात झोपलेल्या कुटुंबियांना जागे केले. रक्ताने माखलेल्या रामा यांना पाहिल्याने कुटुंबिय घाबरले व आरडाओरड केली. शेजारील नागरिक जागे झाले व त्यांना रुग्णालयात घेऊन गेले. शेतकरी रामा भानवसे यांना मारहाणीमुळे मोठ्या प्रमाणात रक्तस्राव झाल्याने ते गंभीर जखमी झाले असून, त्यांच्यावर परंडा उपजिल्हा रुग्णालयात उपचार करून पुढील उपचारासाठी बार्शी येथील रुग्णालयात अतिदक्षता विभागात दाखल करण्यात आले आहे.
याच परिसरात करमाळा रोडलगत सुरेश घाडगे यांच्या शेतात वास्तव्यास असलेल्या ऊसतोड कामगार टोळीच्या कोपीचा कपडा कापून अंदाजे दहा हजार रुपये किंमतीचा मोबाईल चोरट्यांनी चोरून नेल्याची घटना घडली आहे. ही घटना पहाटे ३ वाजण्याच्या सुमारास घडली. या घटनेमुळे परिसरातील नागरिकांमध्ये भिती निर्माण झाली आहे.
दरम्यान, अज्ञात चोरट्यांचे पाकीट घटनास्थळी सापडले आहे. या पुराव्यावरून चोरट्यांचा तत्काळ शोध लावावा, अशी मागणी नागरिक करत आहेत.
