मुंबई : जेष्ठ पत्रकार निखील वागळे यांच्या गाडीवर पुण्यात हल्ला करण्यात आला होता. भाजपच्या आणि अजित पवार गटाच्या कार्यकर्त्यांनी हा हल्ला केल्याचा आरोप त्यावेळी करण्यात आले होते. मात्र अजित पवारांनी आमच्या पक्षाच्या लोकांनी हल्ला केल्याचे आरोप चुकीचे आणि खोटे असल्याचं यापूर्वीच म्हटलं होतं.
अशातच आता शरद पवार गटाने अधिकृत ट्वीटर अकाऊंटवर एक व्हिडिओ शेअर केला आहे. त्या व्हिडिओमध्ये अजित पवार गटाचे पुणे शहर उपाध्यक्ष दत्ता सगरे हे निखिल वागळे यांच्या गाडीवर जीव तोडून लाथ मारताना दिसत असल्याचा आरोप शरद पवार गटाने केला आहे.
अजित पवार यांची दादागिरी आम्ही मोडीत काढू
राष्ट्रवादी काँग्रेस पार्टी शरदचंद्र पवार गटाकडून राष्ट्रवादी काँग्रेस पक्षाचे अध्यक्ष अजित पवार यांच्यावर गंभीर आरोप करण्यात आले आहे. अजित पवार पुण्यातील गुंडगिरिला बळ देत असल्याचा ट्विटद्वारे गंभीर आरोप केला आहे. तसेच अजित पवार यांच्या पक्षाचा पुणे शहराचा उपाध्यक्ष पत्रकार निखिल वागळे यांच्या गाडीला लाथा मारत असल्याचा व्हीडिओ ट्विट करत पुण्यात अराजकता माजवण्यासाठी अजित पवार स्वतःच गुंडांचा वापर करत असल्याचा गंभीर आरोप केला आहे. अजित पवार यांची दादागिरी आम्ही मोडीत काढू असा थेट इशारा शरद पवार गटाकडून देण्यात आला आहे.
काय म्हटल आहे ट्विटमध्ये?
अजून किती काळ जनतेच्या डोळ्यात धूळ फेकणार?, तुमची ‘दादा’गिरी आम्ही मोडीत काढू!… अजित पवार यांच्या गटाचे पुणे शहर उपाध्यक्ष दत्ता सगरे हे या व्हिडीओमध्ये निखिल वागळे यांच्या गाडीवर जीव तोडून लाथ घालताना दिसत आहेत. पत्रकारांसमोर सपशेल खोटं बोलणारे हे उपमुख्यमंत्री जनतेची दिशाभूल करू पाहत आहेत. पुण्याचे पालकमंत्री स्वतः पुण्यात अराजकता माजवायला आपले गुंड वापरत आहेत, हेच यावरून दिसत आहे.
