लोणी काळभोर : बोपगाव (ता. पुरंदर) येथील शेतकऱ्याचा मुलगा नवनाथ दिनकर फडतरे हा राष्ट्रीय प्राध्यापक पात्रता अर्थात नेट जेआरएफ परिक्षेत उत्तीर्ण झाला आहे. फडतरे याने राष्ट्रीय स्तरावरील परीक्षा पास होण्याचा विक्रम तिसऱ्यांदा रचला आहे. त्यामुळे फडतरे याचे पुरंदर तालुक्यासह पुणे जिल्ह्यात भरभरून कौतुक होत आहे.
नेट जेआरएफची परीक्षा डिसेंबर महिन्यात घेण्यात आली होती. या परीक्षेचा निकाल नुकताच लागला आहे. या परीक्षेत फडतरे यांना कनिष्ठ संशोधन फेलोशिप (जेआरएफ) मिळाली आहे. नवनाथ यांचे वडील दिनकर हे सेवानिवृत्त सैनिक आहेत. बंधू अ‍ॅड. दत्तात्रय फडतरे हे सासवड येथील दिवाणी आणि फौजदारी न्यायालयात प्रॅक्टीस करत आहेत. आईने शिक्षणासाठी प्रोत्साहन दिले तर बंधू राकेश यांचे सहकार्य होत असल्याची भावना नवनाथ यांनी व्यक्त केली. सर्वसामान्य शेतकरी कुटुंबातील नवनाथ यांचा शैक्षणिक आलेख आणि गरुडझेप सर्वांसाठी निश्चितच प्रेरणादायी आहे.
नवनाथ फडतरे यांचे प्राथमिक शिक्षण जिल्हा परिषद शाळेत झाले आहे. तर अकरावी-बारावीचे शिक्षण पुणे जिल्हा शिक्षण मंडळाच्या सासवड येथील वाघीरे महाविद्यालयात झाले आहे. पदवीचे शिक्षण त्यांनी सावित्रीबाई फुले पुणे विद्यापीठातून पूर्ण केले. इंडियन इन्स्टिट्यूट ऑफ टॅक्नोलॉजी अर्थात आय.आय.टी. गुवाहाटीमधून पदव्युत्तर पदवी प्राप्त केली. नवनाथ हे शिक्षण घेत असताना शेतातील कामे, डोंगरावर जनावरांना चारायला नेताना इंग्रजी पुस्तकांचे वाचन करणे, प्रवास करताना, बसमधून ये-जा करताना मोकळ्या वेळेत इंग्रजी व्याकरण आणि शब्दभंडार वाढविण्यावर कायम भर देत असत. याचा त्यांना फायदा होत गेला.
नवनाथ फडतरे यांनी कोणताही क्लास न लावता आय.आय.टी. प्रवेश, गेट परीक्षा तसेच यापूर्वी इतिहास मधून नेट, आता संरक्षण आणि सामरिक शास्त्र विषयात नेट परीक्षा उत्तीर्ण झाले आहेत. तसेच आय.आय.टी. गुवाहाटी, आसाम राज्य येथून “इंडियन डिप्लोमॅटीक हिस्टरी अॅण्ड इंटरनॅशनल हिस्टरी”मध्ये पीएचडी करत आहेत.
दरम्यान, पालकांनी मुलांना इंग्रजी माध्यमांच्या शाळांमधून शिक्षण दिल्यानंतरच, खासगी शिकवणीसाठी लाखो रुपयांची फी भरल्यानंतरच मुलं-मुली यशस्वी होतात हे चुकीचे आहे.
परिस्थितीचा बाऊ न करता, कोणतीही कारणे न सांगता, भरपूर मेहनत आणि ज्या क्षेत्रात जायचे, त्या क्षेत्रात स्वत:ला पूर्णपणे झोकून दिले तर सर्वसामान्य, गोरगरिब शेतकरी कुटुंबातील मुलं– मुली देखील आपल्या आई-वडीलांचे नाव उंचावून समाजात चांगले आदर्श निर्माण करु शकतात, हे फडतरे यांनी सिद्ध करून दाखविले आहे.
