Nashik Accident News : मालेगाव : मनमाड-मालेगाव रोडवर भरधाव बस व कांदे घेऊन जाणाऱ्या ट्रॅक्टरची जोरदार धडक झाली. यात ट्रॅक्टर चालकाचा जागीच मृत्यू झाला. तर बसमधील सात ते आठ प्रवासी जखमी झाले. मालेगावच्या चोंढी घाटात ही घटना घडली.
मिळालेल्या माहितीनुसार, नाशिकच्या मनमाड-मालेगाव रोडवर सकाळच्या सुमारास हा अपघात झाला. ही बस मनमाडहून नंदुरबारकडे जात होती. चोंढी घाटाच्या पायथ्याशी एका अवघड वळणावर या भरधावची कांदे घेऊन जाणाऱ्या ट्रॅक्टरची जोरदार धडक झाली. अपघातात ट्रॅक्टर ट्रॉली उलटल्याने रस्त्यावर सर्वत्र कांदा फेकला गेला. अपघात कशामुळे झाला याचे कारण अद्याप समजू शकलेले नाही. मात्र, बस भरधाव असल्याने अपघात झाल्याचे समजते.
अपघातामुळे काही काळ वाहतूक ठप्प झाली होती. स्थानिकांच्या मदतीने जखमींना उपचारासाठी मालेगावच्या खासगी रुग्णालयात हलविण्यात आले आहे. ट्रॅक्टर चालक हा कानडगाव येथील रहिवासी आहे. या भीषण अपघातामुळे परिसरात या अपघाताची एकच चर्चा आहे.
