Nashik Accident News:नाशिक : शहरात वेगवेगळ्या परिसरात तीन अपघाताच्या घटना घडल्या आहेत. बिटको सिग्नल, तपोवन चौफुली आणि खुटवडनगर परिसरात या घटना घडल्या आहेत. या अपघातात दोघांचा मृत्यू झाला असून एक जण जखमी झाल्याची माहिती मिळत आहे.
पहिली अपघाताची घटना ही बिटको सिग्नलजवळ घडली आहे. बिटको सिग्नलवरून पायी चालणाऱ्या वयोवृध्दाला अज्ञात वाहनाने जोरदार धडक दिली. बापूराव जाधव (60, रा. नाशिक) असे त्यांचे नाव आहे. ते अपघातात गंभीर जखमी झाले होते. त्यांना तातडीने उपचारासाठी बिटको रुग्णालयात दाखल करण्यात आले होते. त्यांची प्रकृती गंभीर असल्याने त्यांना जिल्हा शासकीय रुग्णालयात नेण्यात आले. मात्र उपचारादरम्यान त्यांचा मृत्यू झाला.
अपघाताची दुसरी घटना तपोवन चौफुली जवळ घडली. तपोवन चौफुली येथील मेट्रो मॉलजवळून जाणाऱ्या मोटारसायकल स्वाराला अज्ञात वाहनाने धडक दिली. या धडकेत खान अरमान अहमदखान (25, रा. गल्ली नंबर 2, गणेशनगर, वडाळा गाव, नाशिक) हा गंभीरित्या जखमी झाला. त्याला उपचारासाठी रुगणालयात दाखल करण्यात आले. मात्र त्याचा उपचारादरम्यान मृत्यू झाला.
अपघाताची तिसरी घटना खुटवडनगर परिसरात घडली आहे. वाहनाने मोटारसायकलीस जोरदार धडक दिली. यात एक जण जखमी झाला आहे. सुदैवाने यात मनुष्यहानी झालेली नाही. याबाबत शिवम एकबहादूर सोनार (रा. विजया पार्क, वृंदावननगर, डीजीपीनगर, अंबड) यांनी फिर्याद दाखल केली आहे. या प्रकरणी अंबड पोलीस ठाण्यात गुन्हा दाखल करण्यात आला आहे. पुढील तपास पोलीस हवालदार टोपले करीत आहेत.
