बीड : अहमदपूर-अहमदनगर या महामार्गावरील मांजरसुंबा ते पाटोदा दरम्यानच्या ससेवाडी गावाजवळ पिकअप आणि ट्रकचा भीषण अपघात झाला. यामध्ये चार जण जागीच ठार झाल्याची माहिती मिळत आहे. अजूनही काही लोक वाहनांखाली अडकल्याची शक्यता आहे. रात्री उशिरापर्यंत पोलिसांकडून ग्रामस्थांच्या मदतीने लोकांना बाहेर काढण्याचे काम सुरू होते.
हा अपघात शुक्रवारी बारा जानेवारीला रात्री साडे नऊ वाजेच्या सुमारास घडला. अपघात कसा झाला? याबाबत माहिती अद्यापही समोर आलेली नाही. नेकनूर पोलिसांचे पथक घटनास्थळी दाखल झाले आहे. तीन मृतदेह बाहेर काढून नेकनूरच्या रूग्णालयात पाठविण्यात आल्याची माहिती पोलिसांनी दिली आहे. या अपघाताची माहिती मिळताच परिसरातील लोकांनी घटनास्थळी धाव घेतली. तर वाहनांमध्ये अडकलेल्या लोकांना काढण्यासाठी कटर व इतर साहित्य मागविल्याची माहिती पोलिस उपनिरीक्षक नितीन गुट्टूरवार यांनी दिली.
