पिंपरी: दारूच्या नशेत एकाने मित्राला बेदम मारहाण केली आहे. यामध्ये मारहाण झालेल्या मित्राच्या तीन बरगड्या फ्रॅक्चर झाल्या. ही घटना मंगळवारी दोन जानेवारीला दुपारी साडेतीन वाजताच्या सुमारास शाहूनगर चिंचवड येथील शाहू उद्यानात घडली.
सचिन अशोक जगताप असे जखमी झालेल्या व्यक्तीचे नाव आहे. याप्रकरणी सचिन जगताप यांच्या आईने भोसरी एमआयडीसी पोलीस ठाण्यात फिर्याद दिली आहे. त्यानंतर भूषण कैलास पवार (वय 33, रा. स्पाईन रोड, भोसरी) याच्या विरोधात गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, फिर्यादी यांचा मुलगा सचिन जगताप आणि आरोपी भूषण पवार हे दोघे मित्र आहेत. ते मंगळवारी दुपारी चिंचवडमधील शाहूनगर येथील शाहू उद्यानात बसले होते. तिथे त्यांच्यात जुन्या भांडणाच्या कारणावरून जोरदार वाद झाला. त्यानंतर भूषण याने सचिन यांच्या पोटावर दगड मारला. त्यामध्ये सचिन यांच्या तीन बरगड्या फ्रॅक्चर झाल्या आहेत. या घटनेत सचिन जगताप हे गंभीर जखमी झाले आहेत. भोसरी एमआयडीसी पोलीस तपास करीत आहेत.
