पुणे: सावित्रीबाई फुले यांच्या जयंती निमित्त देशातील मुलींची पहिली शाळा भिडेवाडा ते सावित्रीबाई फुले पुणे विद्यापीठ अशी लेखणी ज्योत एसएफआयच्या वतीने काढण्यात आली. मोठया संख्येने विद्यार्थी, विद्यार्थिनी यात सहभागी झाले होते. ज्या भिडे वाड्यामध्ये सावित्रीबाई फुले यांनी मुलींची पाहिली शाळा सुरु केली, त्या भिडे वाड्याचे राष्ट्रीय स्मारक होण्याचा मार्ग मोकळा झाला. याचा आनंद व्यक्त करत लेखणी ज्योतची सुरुवात करण्यात आली.
शासन दत्तक शाळा योजना आणून सर्वसामान्य विद्यार्थ्यांना शिक्षणाच्या प्रवाहाबाहेर फेकण्याचे षडयंत्र रचत आहे. ही योजना रद्द करून शासनाने शिक्षणावर खर्च करावा व स्वतः शाळा चालावाव्यात. बार्टी, सारथी, महाज्योती, TRTI च्या मार्फत संशोधक विद्यार्थ्यांना सरसकट फेलोशिप देण्यात यावी. राजर्षी शाहू महाराज शिष्यवृत्ती आणि डॉ. पंजाबराव देशमुख निर्वाह भत्ता योजना याची काटेकोर अंमलबजावणी, शिक्षणाचे बाजारीकरण व जातीव्यवस्थेला पूरक नवीन शिक्षण धोरण करावे, अशा मागण्या करण्यात आल्या. तसेच मागासवर्गीय विद्यार्थ्यांना शून्य रुपयात प्रवेश देण्याच्या निर्णयाची अंमलबजावणी करण्याचे निवेदन कुलगुरूंना देण्यात आले.
भिडेवाड्यापासून सुरू झालेल्या लेखणी ज्योतचे उद्घाटन फर्ग्युसन महाविद्यालयाचे प्राध्यापक डॉ. चंदनशिवे यांनी केले. जेधे कॉलेज, गरवारे कॉलेज, फर्ग्युसन कॉलेज या ठिकाणी लेखणी ज्योतचे उत्स्फूर्त स्वागत विद्यार्थ्यांनी केले. रॅलीदरम्यान छत्रपती शिवाजी महाराज, छत्रपती संभाजी महाराज, डॉ. बाबासाहेब आंबेडकर यांना अभिवादन करण्यात आले. तर सावित्रीबाई फुले पुणे विद्यापीठाच्या प्रांगणातील सावित्रीबाई फुले यांच्या पुतळ्याला अभिवादन करून सभा घेण्यात आली. यावेळी ‘मी सावित्री बोलतेय’ या एकपात्री नाटकाचे सादरीकरण देवयानी फुले या विद्यार्थिनीने केले. जन आरोग्य मंचचे डॉ. सुधिर दैठणकर, एसएफआयचे राज्य अध्यक्ष सोमनाथ निर्मळ, जिल्हा सचिव नवनाथ मोरे यांनी विद्यार्थांना संबोधित केले.
