लोणावळा: वेहेरेगाव येथे पोलिसांनी एका मटका अड्ड्यावर कारवाई करत अडीच लाखांचा मुद्देमाल जप्त केला असून 16 जणांविरोधात गुन्हा दाखल केला आहे. ही कारवाई शुक्रवार 29 डिसेंबर रोजी लोणावळा उपविभागाचे सहायक पोलीस अधिक्षक सत्यसाई कार्तिक यांच्या मार्गदर्शनाखाली करण्यात आली.
दोन एजंट व मटका लावणारे 10 जणांना ताब्यात घेण्यात आले आहे. या तपासादरम्यान चंद्रकांत देवकर, शंकर बोरकर, निलेश बोरकर, संतोष बोत्रे हे सदरचा मटका अड्डा चालवत असल्याचे निष्पन्न झाले आहे.
पोलिसांनी दिलल्या माहितीनुसार, सहायक पोलीस अधिक्षक सत्यसाई कार्तीक यांना गुप्त बातमीदारामार्फत माहिती मिळाली होती की, लोणावळा ग्रामीण पोलीस स्टेशन हद्दीतील वेहेरगाव येथे काही इसम अवैधरित्या मटका अड्डा चालवत आहेत. त्यानुसार सत्यासाई कार्तिक यांनी त्यांच्या पथकाला मिळालेल्या बातमीचे ठिकाणी पाठवले. यावेळी वेहेरगाव येथे मोकळ्या रानामध्ये एका झाडाखाली पथकाने टाकलेल्या छाप्यामध्ये मटक्याचे नंबर घेणारे दोन एजंट आणि मटका लावणारे 10 जणांना यांना ताब्यात घेण्यात आले. त्यांच्याकडून पोलिसांनी 2 लाख 50 हजार 485 रुपयांचा मुद्देमाल जप्त केला.
याप्रकणी पोलिसांनी लोणावळा ग्रामीण पोलीस स्टेशन येथे महाराष्ट्र जुगार प्रतिबंध अधिनियमच्या विविध कलमान्वये 16 जणांविरोधात गुन्हा नोंद केला असून पुढील तपास लोणावळा ग्रामीण पोलीस करत आहेत.
ही कारवाई पुणे ग्रामीण पोलीस दलाचे पोलीस अधीक्षक अंकित गोयल, अपर पोलीस अधीक्षक मितेश घट्टे यांच्या मार्गदर्शनाखाली लोणावळा उपविभागाचे सहायक पोलीस अधीक्षक सत्यसाई कार्तिक, सहायक पोलीस निरीक्षक सचिन राऊळ, पोलीस उपनिरीक्षक शुभम चव्हाण, भारत भोसले, पोलीस हावालदार नितेश (बंटी) कवडे, सचिन गायकवाड, अंकुश नायकुडे, पोलीस नाईक रईस मुलानी, पोलीस शीपाई सुभाष शिंदे, होमगार्ड सागर दळवी यांच्या पथकाने केली.
