मुंबई : मुंबईत अल्पवयीन मुलाच्या चेहऱ्यावर सॅनिटायझर टाकून पेटवून दिल्याची धक्कादायक घटना समोर येत आहे. शहरातील अंधेरीतील डी. एन नगर परिसरात ही घटना घडली आहे. अंगावर शिंकला म्हणून हे कृत्य केल्याचं उघडकीस आलं आहे. सद्या पीडित मुलावर कुपर रुग्णालयात उपचार सुरु आहेत. या प्रकरणी पीडित मुलाच्या आजीने पोलिसांत तक्रार दाखल केली आहे.
मिळालेल्या अधिक माहितीनुसार, बुधवारी सध्यांकाळी पीडित मुलगा नमाजसाठी जातो असं सांगून घरातून बाहेर पडला. काही वेळ बाहेर मित्रासोबत खेळत होता त्यानंतर रडत रडत घरात आला. त्यावेळी त्याचा चेहरा आणि कानाचा काही भाग जळला होता. हे पाहून आजी घाबरली आणि आजीने तात्काळ मुलाला कुपर रुग्णालयात दाखल केले.
या संदर्भात मुलाला विचारणा केली असता एका मुलाने चेहऱ्यावर सॅनिटायझर टाकून पेटवून दिल्याची माहिती दिली. यानंतर आजीने पोलिस ठाण्यात आरोपी मुलाविरोधात तक्रार दाखल केली. मुलाविरोधात डी.एन पोलिस ठाण्यात तक्रार दाखल झाली.
नेमकं प्रकरण काय ?
घराबाहेर मित्रासोबत फोनमध्ये गेम खेळत असताना, आरोपी मुलगा त्याच्याजवळ आला, काही वेळानंतर पीडितेला शिंका आली तो आरोपी मुलाच्या अंगावर शिंकला. या गोष्टीचा मनात राग धरत आरोपी मुलाने घरातून लायटर आणि सॅनिटायझर आणले आणि पीडित मुलाच्या कानावर आणि चेहऱ्यावर टाकले आणि लायटरने पेटवले.
ही घटना पाहून जवळ असलेल्या स्थानिकांनी पीडित मुलाच्या अंगावर पाणी ओतले आणि त्याचे प्राण वाचवले. या घटनेत पीडित गंभीर जखमी झाला. आजीने मुलाविरोधात तक्रार दाखल केली असून आरोपी मुलाची रवानगी बालसुधारगृहात करण्यात आली असल्याची माहिती पोलिसांनी दिली.
