पुणे : बंद सदनिकांवर पाळत ठेवून चोरी करण्याच्या घटनांमध्ये वाढ होत असतानाच, आता नामांकित वस्त्रदालनाचा दरवाजा उचकटून मध्यरात्रीच्या सुमारास चोरी केल्याची घटना खराडी परिसरात घडली आहे. कपडे तसेच रोकड असा सुमारे चार लाख ६४ हजार रुपयांचा ऐवज चोरट्यांनी लांबवल्याची माहिती मिळत आहे.
याबाबत पंकजकुमार यादव (वय ३६, रा. केसनंद रस्ता, वाघोली) यांनी चंदननगर पोलीस ठाण्यात फिर्याद दिली आहे. खराडी बाह्यवळण मार्गावरील पीटर इंग्लड वस्त्रदालनात यादव हे व्यवस्थापक आहेत. चोरट्यांनी मध्यरात्री वस्त्रदालनाचा दरवाजा उचकटून आत प्रवेश केला.
पोलिसांनी दिलेल्या माहितीनुसार, या चोरीमध्ये चोरट्यांनी गल्ल्यातील ४१ हजार १८७ रुपये आणि शर्ट, पॅण्ट असे कपडे चोरून नेले. त्याचप्रमाणे चोरट्यांनी वस्त्रदालनातून चार लाख ६४ हजार १९८ रुपयांचा मुद्देमाल चोरून नेल्याचे उघडकीस आले.
या घटनेचा अधिक तपास सहायक पोलीस निरीक्षक माने करत आहेत.
