ajit pawar : नागपूर : एकेकाळी एकत्र असलेले अजित पवार आणि जयंत पाटलांनी सध्या एकमेकांना सुनावण्याची एकही संधी सोडत नाहीत. हे आज अधिवेशनाच्या शेवटच्या दिवशी विधानसभेत पहायसला मिळालं. त्यामुळे सभागृहाचं वातावरण चांगलंच तापल्याचं दिसून आलं. सध्या राज्यात दोन उपमुख्यमंत्री आहेत. त्यावरून जयंत पाटलांनी टोला लगावला. त्यावर प्रत्युत्तर देताना सभागृहात एक आणि बाहेर एक भूमिका मांडण्याचा धंदा बंद करा असा सल्लाही अजित पवारांनी दिला. दोघांपैकी कुणी आधी बोलायचं ते ठरवा असा टोला जयंत पाटलांनी लगावल्यानंतर अजित पवार चांगलेच भडकले होते .
नेमकं काय घडलं?
प्रस्तावाच्या मुद्द्यांवरून अधिवेशनाच्या शेवटच्या दिवशी सत्ताधारी आणि विरोधक एकमेकांच्या आमनेसामने आले. शेवटच्या दिवशी केवळ तीन प्रस्ताव मांडले गेले. त्यावरून जयंत पाटलांनी राज्य सरकारवर टीका केली. ते म्हणाले की, सभागृह संपलं नाही. एक तर दहा दिवसांचे अधिवेशन केलं आणि तिकडून दोन प्रस्ताव आणि इकडून एक प्रस्ताव असं हे बरोबर नाही. त्यासाठी आम्ही म्हणत होतो की एक महिन्याचं अधिवेशन घ्या आणि चर्चा करा. जयंत पाटलांच्य भाषणावेळी दोन्ही उपमुख्यमंत्री एकमेकांशी चर्चा करत असल्याचं त्यांच्या निदर्शनास आलं. त्यानंतर जयंत पाटील म्हणाले की, तुमच्यात आधी ठरवा की कोण आधी बोलायचं ते.
अजित पवार भडकले
जयंत पाटलांच्या या टोल्यानंतर उपमुख्यमंत्री अजित पवार चांगलेच भडकले. ते म्हणाले की, आमचं अंडरस्टँडिंग चांगलं आहे. त्यामुळे कसं बोलायचं आम्हाला माहिती आहे. कामकाज सल्लागार समितीमध्ये वेळ कमी उरला. अंतिम आठवडा प्रस्ताव काल आला होता. त्यावेळी विरोधी पक्षाला माहिती होतं की अधिवेशन आज संपणार आहे. त्यावेळी त्यांनी सांगायला पाहिजे होतं. सभागृहात एक बोलायचं आणि बाहेर एक बोलायचं हे धंदे बंद करा. विदर्भाच्याबद्दल उत्तर आलंच पाहिजे यासाठी आम्ही ठरवलं. त्यासाठी प्रवीण दरेकरांनी विदर्भाचा प्रस्ताव मांडला. अतिशय चांगल्या पद्धतीने ते काम त्यांनी केलं. त्यावर देवेंद्र फडणवीस उत्तर देणार आहेत, असे अजित पवार म्हणाले.
