नागपूर: दिशा सालियान केस तपासाच्या आदेशानंतर विरोधकांचे आधीच दिशाहीन झालेले गलबत आणखीन भरकटले, असा जोरदार टोला मुख्यमंत्री एकनाथ शिंदे यांनी विरोधकांना लगावला. विधानसभेत अंतिम आठवडा प्रस्तावावरील चर्चेला उत्तर देताना मुख्यमंत्री शिंदे यांनी विरोधकांनी केलेल्या टीकेचा खरपूस समाचार घेतला.
मुख्यमंत्री एकनाथ शिंदे यांनी म्हटले की, हा प्रस्ताव दाखल करताना विरोधी पक्ष गोंधळलेल्या अवस्थेत दिसत आहे. चहापानावर बहिष्कार टाकला तेव्हा विरोधकांचे पत्र आले अवसान गळाले असल्याचे दिसून आले. वरिष्ठ नेते इंडी आघाडीचे जागा वाटपात व्यग्र असल्यामुळे, दिशा प्रकरणामुळे आधीच दिशाहीन झालेले गलबत आणखीन भरकटलेले दिसले असल्याचे टोला मुख्यमंत्रा एकनाथ शिंदे यांनी लगावला.
आम्ही राज्याची सत्ता हाती घेतली आणि एफडीआयमध्ये महाराष्ट्र पुन्हा पहिल्या क्रमांकावर आले. मेट्रो, कारशेड, समृद्धी, बुलेट ट्रेन, सी लिंक, मिसिंग लिंक, कोस्टल रोड या पायाभूत सुविधांचा यू टर्न बंद करत फास्ट ट्रॅकवर आणल्याचे मुख्यमंत्र्यांनी म्हटले.
मुख्यमंत्री एकनाथ शिंदे यांनी काँग्रेसचे नेते अशोक चव्हाण यांच्यावर मराठा आरक्षणाच्या मुद्यावर जोरदार टीका केली. अशोक चव्हाण हे सभागृहात नाहीत. मंगळवारी त्यांनी आरोप केला की मराठ्यांच्या जिव्हाळ्याच्या प्रश्नात राजकारण केले. मी अध्यक्ष होऊ नये म्हणून त्यांनी पडद्याआड प्रयत्न केले. मी अध्यक्ष झालो तर तातडीने मराठा आरक्षण मिळावे म्हणून काम करेल. ही भीती अडीच वर्षांचे मुख्यमंत्री व अशोक चव्हाण यांना होती, असा दावाही मुख्यमंत्री शिंदे यांनी केला. आपल्या आदर्श कारभारामुळे अशोक पर्व चमकले पण मराठा पर्व आपण अंधारात ठेवले, असा टोलाही शिंदे लगावला.
