Chhatrapati Sambhaji Nagar : छत्रपती संभाजीनगर शहरात चार वर्षे ‘लिव्ह इन’ मध्ये राहणाऱ्या महिलेने प्रियकराची हत्या केल्याची धक्कादायक घटना घडली आहे. ओळखीच्या लोकांच्या आणि स्वतःच्या मुलाच्या मदतीने या महिलेने प्रियकराला विवस्त्र करून बेदम मारहाण केली. त्यानंतर त्याला शहरातील साई टेकडी परिसरात फेकून दिले होते. दुसऱ्या दिवशी लोकांना मृतदेह आढळून आल्यावर या सर्व प्रकरणाचा उलगडा झाला आहे. आनंद साहेबराव वाहुळ (वय 27 वर्षे, रा. कबीरनगर, उस्मानपुरा) असे मारहाणीत मृत्यू झालेल्या तरुणाचं नाव आहे.
पोलिसांनी दिलेल्या अधिक माहितीनुसार, आनंद हा रिक्षाचालक होता. त्याचे एका 45 वर्षीय महिलेसोबत प्रेमसंबध होते आणि ते दोघेही चार वर्षांपासून ‘लिव्ह इन’ मध्ये राहत होते. काही दिवसांपासून दोघांमध्ये वाद सुरु होते. त्यामुळे आनंद हा मुंबईला निघून गेला होता. मात्र, मागील आठवड्यात तो पुन्हा शहरात आला आणि येताच महिलेला भेटण्यासाठी तिच्या चिकलठाणा परिसरातील घरी गेला.
त्यावेळा माझा नाद सोड, माझा मुलगा मोठा झाला आहे, त्याला ही बाब कळेल, वाद वाढतील, अशी विनंती महिलेने केली होती, तरी आनंद ऐकत नव्हता. शेवटी महिला, तिचा मुलगा आणि अन्य तीन आरोपींनी 13 डिसेंबर रोजी आनंदला विवस्त्र करून बेदम मारहाण केली. त्यानंतर त्याला दुचाकीवर नेऊन साई टेकडी परिसरात टाकून दिले. दरम्यान, बेदम मारहाणीमुळे आनंदचा मृत्यू झाला.
साई टेकडी परिसरात ईव्हीनिंग वॉकिंगला गेलेल्या काही नागरिकांना मृतदेह आढळल्याने त्यांनी तात्काळ चिकलठाणा पोलिसांना घटनेची माहिती दिली. घटनेचे माहिती मिळताच पोलीस निरीक्षक रविंद्र खांडेकर, उपनिरीक्षक योगेश खटाणे यांचे पथक घटनास्थळी धाव घेतली. पोलिसांनी मृतदेह शवविच्छेनदासाठी घाटीतील शवागृहात पाठवून दिला.
