हिंजवडी: एका बांधकाम साईटवर काम करणाऱ्या कामगाराने साईटवरून ६१ हजारांची लोखंडी वायर चोरून विकल्याची घटना उघडकीस आली आहे. ही घटना १६ ऑक्टोबर रोजी मध्यरात्री हिंजवडी येथील ब्ल्यूरिच टॉवर या बांधकाम साईटवर घडली.
कैलास गंगाधरराव देशमुख (वय २९, रा. उंड्री, पुणे) असे वायर चोरी करणाऱ्या कामगाराचे नाव आहे. पोलिसांनी त्याला अटक केली आहे. याप्रकरणी किरण दत्तात्रय पालखे (वय ३९, रा. स्वारगेट) यांनी हिंजवडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी कैलास देशमुख हा हिंजवडी येथील ब्ल्युरीच टॉवर द ओरीयन येथे काम करत होता. देशमुख याने बांधकाम साईटवर बांधकामासाठी लागणारी ६१ हजार रुपये किमतीची लोखंडी वायर चोरी करून विकली. हा प्रकार उघडकीस आल्यानंतर याबाबत गुन्हा दाखल करण्यात आला आहे. हिंजवडी पोलीस आधिक तपास करीत आहेत.
