मुंबई : मुंबईतील गिरगाव चौपाटी भागात आगीची मोठी दुर्घटना घडली आहे. गिरगावमधील एका चार मजली इमारतीला भीषण आग लागली. या आगीत दोन जणांचा होरपळून मृत्यू झाला आहे. हिरेन शाह (वय, ६०) आणि नलिनी शाह (८२) या दोघांचा मृत्यू झाला असून नऊ जणांना रेस्क्यू करुन वाचवण्यात अग्निशमन दलाला यश आलं आहे.
गिरगाव चौपाटी भागात चार मजली इमारतींच्या तिसऱ्या मजल्यावर शनिवारी रात्री ही आग लागली. या आगीच्या घटनेची माहिती मिळल्यावर अग्निशमनदलाच्या १५ गाड्या दाखल झाल्या. अग्नीशमन दलाच्या अथक प्रयत्नानंतर आगीवर नियंत्रण मिळवले. यावेळी नऊ जणांना रेस्क्यू करुन वाचवण्यात अग्निशमन दलाला यश आले. मात्र या घटनेत दोन जणांचा होरपळून मृत्यू झाला. दरम्यान रेस्क्यू करुन काढलेल्या नऊ जणांना उपचारासाठी रुग्णालयात दाखल करण्यात आले आहे.
दरम्यान, ही आग कशामुळे लागली, याबाबत अधिकृत माहिती मिळाली नाही. परंतु पोलिसांनी या प्रकरणाची नोंद केली असून ही आग कशामुळे लागली, याचे कारण शोधत आहेत. या घटनेचा व्हिडिओ सोशल मीडियावर व्हायरल झाला आहे. या घटनेमुळे परिसरातील नागरिंकामधे भीतीचे वातावरण निर्माण झाले होते.
