छत्रपती संभाजीनगर : छत्रपती संभाजीनगर येथील नागपूर ते मुंबईला जाणाऱ्या रस्त्यावरील आरापूर शिवारातील गवळी शिवरा कमानीजवळ मराठा योध्दा मनोज जरांगे पाटील यांचा साखळी उपोषणाचा बॅनर लावण्यात आला होता. या बॅनरवर मनोज जरांगे यांचाही फोटो लावण्यात आला होता.
मात्र, शुक्रवारी दुपारच्या सुमारास जरंगे यांचा फोटो अज्ञात व्यक्तीने फाडला. याप्रकरणी शिल्लेगाव पोलिस ठाण्यात तक्रार दाखल करण्यात आली असून हा बॅनर फेडण्याचा प्रकार कोणी केला, याचा शोध पोलीस घेत आहेत. याप्रकरणामुळे राजकीय वातावरण तापण्याची शक्यता वर्तवण्यात येत आहे. (Manoj Jarange)
काल जालन्यात ओबीसी एल्गार मेळावा पार पडला. यावेळी बोलताना छगन भुजबळ यांनी मराठा समाजाच्या आरक्षणाचे बॅनर काढण्याचे वक्तव्य केले होते. या वक्तव्यामुळेच मनोज जरंगे पाटलांचे बॅनर फाडण्यात आल्याचा आरोप पोलिसांच्या एफआयआरमध्ये करण्यात आला आहे. तर, संदीप भाऊसाहेब औताडे यांच्या तक्रारीवरून अज्ञात व्यक्ती विरोधात गुन्हा दाखल करण्यात आला आहे. मात्र, अज्ञात व्यक्ती विरोधात दिलेल्या एफआयआरमध्ये थेट भुजबळ यांचे नाव आल्याने राजकीय वर्तुळात खळबळ उडाली आहे. ( Chhagan Bhujbal) (Maratha Reservation)
मराठा समाजाचे आरक्षणाचे बॅनर काढून टाका : छगन भुजबळ
जालन्यातील ओबीसी मेळाव्यात मार्गदर्शन करताना छगन भुजबळ यांनी दोन समाजात तेढ निर्माण होईल अशा प्रकारचे वक्तव्य केलं. एवढच नाही तर त्यांनी महाराष्ट्रामध्ये गावोगावी लावलेले मराठा समाजाचे आरक्षणाचे बॅनर काढून टाका अशा प्रकारचे वक्तव्य जाहीर सभेत केलं. त्यांच्या या वक्तव्यानंतरच बॅनर फाडल्याचा दावा तक्रारदाराने केला आहे.
या सर्व प्रकारात छगन भुजबळ यांचा हात अशे. त्यांच्या विरुद्ध प्रक्षोभक भाषण करुन दोन समाजात तेढ निर्माण करणे, जातीय सलोखा बिघडवणे, कायदा व सुव्यवस्थेचा प्रश्न निर्माण करुन सकल मराठा समाजाच्या धार्मिक भावना दुखावल्याचा आरोप केला आहे. छगन भुजबळ यांच्यावर कायदेशीर कारवाई करावी, अशी मागणी करण्यात आली आहे.
