Pimpari News : पिंपरी : पिंपरी-चिंचवडमध्ये राहत्या घराला आग लागल्याची घटना ताजी असतानाच पुन्हा एकदा कारला आग लागल्याची घटना घडली आहे. शुक्रवारी (ता. ८) सकाळी साडेदहा वाजण्याच्या सुमारास चिंचवडमधील संभाजीनगर येथे चालत्या ओम्नी कारने पेट घेतला आहे.
चालत्या ओम्नी कारने पेट घेतला
याबाबत मिळालेल्या माहितीनुसार, ओम्नी कार (क्र. एम.एच. १२ ए.एक्स. ५७८७) ही चिंचवडमधील थरमॅक्स चौकाकडून केएसबी चौकाकडे जात होती. येथील एचपी पेट्रोल पंपाच्या पुढे आल्यानंतर कारने अचानक पेट घेतला.
दरम्यान, अचानक घडलेल्या या प्रकारामुळे गोंधळलेल्या चालकाने प्रसंगावधान राखत कारमधून बाहेर उडी मारली. त्यानंतर तातडीने या घटनेची माहिती अग्निशमन विभागाला देण्यात आली. अग्निशमन विभागाची गाडी घटनास्थळी दाखल होण्यापूर्वीच कार जळून खाक झाली. कार पेटल्याने धुराचे लोट हवेत पसरले होते. ही घटना कॅमेऱ्यात कैद करण्यासाठी बघ्यांनी गर्दी केली होती.
