अक्षय भोरडे
तळेगाव ढमढेरे : शिक्रापूर (ता. शिरूर) येथील दहा युवक केदारनाथ दर्शनासाठी उत्तराखंड येथे गेले होते. या वेळी त्यांनी बुकिंग केलेल्या हॉटेलमधून त्यांची फसवणूक झाल्याचे लक्षात येताच युवकांनी उत्तराखंड पोलिसांशी संपर्क साधला. हजरजबाबीपणा दाखवत उत्तराखंड पोलिसांनी युवकांना तातडीने मदतीचा हात दिला. तसेच फसवणूक झालेली रक्कम युवकांना परत मिळवून दिली.
शिक्रापूर येथील सुरज खेडकर, किशोर केवटे, मनोज गायकवाड, हर्षल चव्हाण, संकेत खेडकर, आकाश भुजबळ, सुनील दौंडकर, ओंकार केवटे, प्रविण गाडे हे युवक केदारनाथ दर्शनासाठी उत्तराखंड येथे गेले होते. तेथे राहण्यासाठी त्यांनी हॉटेलची रुम बुक केली होती. बुकिंगसाठी युवकांनी हॅाटेल मालकाला १२ हजार रुपये पाठवले होते. युवक केदरनाथमध्ये पोहचल्यानंतर संबंधित हॉटेल मालक युवकांच्या फोनला प्रतिसाद देत नव्हता. युवकांना दिलेल्या पत्त्यावर हॅाटेल देखील नव्हते. त्यामुळे सयुवक त्रस्त झाले. पुढील दोन तास हॉटेलचा शोध घेतला. मात्र, या नावाचे हॉटेल न सापडल्याने आपली फसवणूक झाल्याचे त्यांच्या लक्षात आले.
दरम्यान, फसवणूक झाल्याचे लक्षात येताच युवकांनी उत्तराखंडमधील गुप्त काशी पोलीस चौकी गाठली. घडलेला प्रकार त्यांनी पोलिसांना सांगितला. त्यांनतर पोलिसांनी हॉटेल मालकाचा नंबर युवकांकडून घेऊन, बारा तासांत हॉटेल मालकाचा शोध घेतला. फसवणूक झालेले पैसे देखील युवकांना परत केले. पोलिसांनी तत्परतेने दाखवलेल्या सहकार्याबद्दल शिक्रापुरातील युवकांनी उत्तराखंड पोलिसांचे आभार मानले.
