Earthquake News : कोल्हापूर : कोल्हापूर जिल्ह्यासह सांगली आणि सातारा जिल्ह्यात आज सकाळी भूकंपाचे सौम्य धक्के जाणवले. येथून भूकंपाचे केंद्र साताऱ्यातील कोयना धरणापासून फक्त २० किलोमीटर अंतरावर असल्याने, परिसरात भीतीचे वातावरण निर्माण झाले आहे. हा भूकंप ३.४ रिश्टर स्केल तीव्रतेचा होता. आज सकाळी ६ वाजून ४५ मिनिटांनी भूकंपाचे धक्के जाणवले.
भूकंपाचे सौम्य धक्के
कोयना धरणापासून हे धक्के २० किलोमीटर अंतरावर जाणवल्याने धरण क्षेत्राला कोणतीही बाधा न झाल्याची माहिती समोर आली आहे. कोयना धरण सुरक्षित आहे. सुदैवाने भूकंपामुळे कोणतीही जीवितहानी झालेली नाही. दरम्यान, सातारा जिल्ह्यातील पाटण शहरासह लगतच्या गावांमध्ये भूकंपाचे धक्के जाणवले. पहाटे ६ वाजून ४० मिनिटांनी भूकंपाचा धक्का बसला. कोल्हापूर, साताऱ्यासह सांगली जिल्ह्यातील शिराळा तालुक्यातील चांदोली अभयारण्य परिसरापासून १५ किलोमीटर परिसरात भूकंपाचे सौम्य धक्के जाणवले. सांगली जिल्ह्यातील शिराळा तालुक्यातील चांदोली अभयारण्यापासून १५ किलोमीटरवर भूकंपाचे सौम्य धक्के जाणवले. नॅशनल सेंटर फॉर सिस्मॉलॉजीनुसार, या भूकंपाचा केंद्रबिंदू हा जमिनीपासून ५ किलोमीटर खाली होता.
दरम्यान, गेल्या महिन्यात सिंधुदुर्ग जिल्ह्यातही भूकंपाचे धक्के जाणवले होते. २९ जुलै रोजी सावंतवाडी तालुक्यात भूकंपाचे धक्के जाणवले होते. माडखोल, कलंबिस्त, सरमळे, ओटवणे, कारिवडे, कोनशी, भालावल, ओवळीये, धवडकी, विलवडे आदी गावांमध्ये मोठा आवाज होऊन सौम्य धक्के जाणवले आणि जमीनही हादरली होती. तीन वर्षांपूर्वी असाच काहीसा धक्का सावंतवाडी शहरासह परिसरात बसला होता. या वेळी माडखोलसह दाणोली, सातोळी, बावळट अगदी बांद्यापर्यंत जमीन हादरल्याचे अनेकांकडून सांगण्यात आले होते
