पुणे : स्वारगेट परिसरात ज्येष्ठ नागरिकाच्या घरातून सोन्याचे दागिने चोरणाऱ्या बंटी-बबलीच्या जोडीला गुन्हे शाखेच्या युनिट २ च्या पथकाने अटक केली आहे. त्यांच्याकडून तब्बल पावणेतेरा लाख रुपयांचे सोन्याचे दागिने जप्त करण्यात आले आहेत.
रेखा राहुल क्षीरसागर (वय ३०, रा. वानवडीगाव), ऋषभ विनोद जाधव (रा.रामटेकडी) अशी अटक करण्यात आलेल्या आरोपींची नावे आहेत.
गुन्हे शाखेच्या युनिट २ च्या पथकाचे वरिष्ठ पोलीस निरीक्षक क्रांतीकुमार पाटील यांनी दिलेल्या माहितीनुसार, स्वारगेट परिसरातून एका ज्येष्ठ नागरिकाच्या घरी आरोपी घरकाम करण्याच्या बहाण्याने आले होते. आरोपींनी घरातून आरोपींनी दागिने लांबविले होते. या प्रकरणी स्वारगेट पोलिस ठाण्यात गुन्हा दाखल करण्यात आला होता.
सदर गुन्ह्याचा तपास गुन्हे शाखेच्या युनिट दोनचे पथक तपास करीत असताना, पथकाला आरोपी स्वारगेट परिसरातील नटराज हॉटेल परिसरात येणार असल्याची माहिती एका खबऱ्यामार्फत मिळाली. मिळालेल्या माहितीच्या अनुशंघाने पथकाने सदर ठिकाणी सापळा रचला. या सापळ्यात वरील दोन्ही आरोपी अलगद अडकले.
दरम्यान, पोलिसांनी आरोपी रेखा क्षीरसागर आणि ऋषभ जाधव यांना ताब्यात घेऊन अधिक चौकशी केली असता, आरोपींनी एका ज्येष्ठ नागरिकाच्या घरातून दागिने चोरल्याची कबुली दिली. त्यांच्याकडून पावणेतेरा लाख रुपयांचे दागिने जप्त करण्यात आले.
हि कारवाई वरिष्ठ पोलीस निरीक्षक क्रांतीकुमार पाटील यांच्या मार्गदर्शनाखाली सहायक पोलीस निरीक्षक वैशाली भोसले, विशाल मोहिते, उपनिरीक्षक राजेंद्र पाटोळे, नितीन कांबळे, उज्वल मोकाशी, उत्तम तारु, गजानन सोनुने आणि साधना ताम्हाणे यांच्या पथकाने केली आहे.
