Pune Crime पुणे : कंपनीत पैसे गुंतविल्यास चांगला परतावा देण्याच्या आमिषाने वास्तुविशारद व्यवसायिक तरुणाची ८१ लाख ५० हजार रुपयांची फसवणूक करण्यात आल्याचा प्रकार उघडकीस आला आहे. याप्रकरणी एकावर समर्थ पोलिस ठाण्यात गुन्हा दाखल करण्यात आला आहे.
ज्ञानेश्वर लक्ष्मण घाडगे (रा. वागळे इस्टेट, पुणे) असे आरोपीचे नाव आहे.
पोलिसांनी दिलेल्या माहितीनुसार…!
घाडगेने तरुणाला कंपनीत पैसे गुंतविल्यास चांगला परतावा देण्याचे आमिष दाखवले. तरुणाचा विश्वास संपादन करून आरोपीने ‘इन्कम रूट इन्व्हेस्टमेंट अँड फायनान्शियल सर्व्हिसेस प्रायव्हेट लिमिटेड’ या कंपनीत वेळोवेळी पैसे गुंतवण्यास भाग पाडले.
पैसे गुंतवल्यानंतर परताव्याचे पैसे वेळेत दिल्याने तरुणाचा आरोपीवर विश्वास बसला. त्याचा गैरफायदा घेऊन आरोपीने दरमहा टीडीएस वजा करून गुंतवणुकीच्या नऊ टक्के मोबदला देणार असल्याचे तक्रारदाराला सांगितले.
दरम्यान, गुंतवणुकीसाठी ८१ लाख ५० हजार रुपये घेऊन मोबदला न देता; तसेच गुंतवणुकीची रक्कम परत न करता तरुणाची आर्थिक फसवणूक करण्यात आली. पोलिस उपनिरीक्षक एस. त्रंबके तपास करीत आहेत.
