(Pimpri Chinchwad Crime)पिंपरी-चिंचवड : पुणे शहरासह पिंपरी-चिंचवड परिसरात टोळीकडून दहशतीसाठी वाहनांची तोडफोड केली जात असल्याच्या घटना घडत आहेत. भोसरीमधून अशीच एक घटना समोर आली आहे. एका कार चालकाला मारहाण करून लुटले तसेच कारची व इतर वाहनांची तोडफोड करण्यात आली आहे. या घटनेनंतर परिसरात भितीचे वातावरण तयार झाले. हा प्रकार मंगळवारी (दि. 4) रात्री दोन वाजताच्या सुमारास दिघी रोड, भोसरी येथे घडला.
याप्रकरणी सोहेल लाल पठाण (वय 26, रा. भोसरी) यांनी याप्रकरणी भोसरी पोलीस ठाण्यात फिर्याद दिली आहे. त्यानुसार विन्या चव्हाण आणि त्याच्या दोन साथीदारांच्या विरोधात गुन्हा दाखल करण्यात आला आहे.
मिळालेल्या माहितीनुसार…!
फिर्यादी हे कामावरून घरी भोसरी येते जात होते. त्यावेळी रस्त्यावर तिघांनी त्यांची कार अडवली. आरोपी विन्या याने त्याच्या साथीदारांसोबत मिळून गल्लीतील वाहनांची तोडफोड केली. फिर्यादींना अडवून, ‘मी इथला भाई आहे. तुझ्या खिशातील पैसे काढून दे’ अशी धमकी दिली.
फिर्यादींनी पैसे देण्यास नकार दिला असता आरोपींनी त्यांना मारहाण करून जबरदस्तीने त्यांच्या खिशातील 1200 रुपये जबरदस्तीने काढून घेतले. त्यानंतर परिसरात अन्य वाहनांची तोडफोड करत दहशत निर्माण केली असल्याचे फिर्यादीत म्हटले आहे. पुढील तपास पोलीस करत आहेत.
