मुंबई : पत्नी व दोन मुलांना संपवून पतीने आत्महत्या केल्याची धक्कादायक घटना मुंबईतील चिखलवाडी परिसरातील इंदिरानगर झोपडपट्टीमध्ये उघडकीस आली आहे. यामुळे परिसरात एकच खळबळ उडाली आहे.
पत्नी नाझिया शकील खान (वय-३०), मुलगा सरफराज खान (वय-७) आणि मुलगी अतीफा खान असे खून झालेल्या आई आणि मुलांची नावे आहेत. तर शकील जलील खान (वय-३४) असे खून करून आत्महत्या केलेल्या पतीचे नाव आहे.
पोलिसांनी दिलेल्या माहितीनुसार, शकील आणि नाझिया यांचा ९ वर्षापूर्वी विवाह झाला होता. ते मूळचे उत्तर प्रदेश येथील होते. सद्या शकीलचे कुटुंब चिखलवाडीतील इंदिरानगर झोपडपट्टीमध्ये राहत होते. शकील हा शांत आणि आनंदी स्वभावाचा व्यक्ती होता. तो शिवाजी नगर मध्ये एक छोटेसे किराणा मालाचे दुकान चालवीत होता.
दरम्यान, सकाळी फोन उचलत नाही म्हणून शकीलचा भाऊ सुफीयन घरी आला. तेव्हा शकीलच्या घराचा दरवाजा बंद होता. दरवाजा उघडण्यासाठी शकीलला आवाज दिला. मात्र घरातून कोणत्याही प्रकारचा प्रतिसाद आला नाही. त्यानंतर सुफीयनने घराचा दरवाजा तोडला. तेव्हा घरात चार मृतदेह आढळून आले आहे.
या घटनेची माहिती मिळताच, शिवाजी नगर पोलीस ठाण्याचे वरिष्ठ पोलीस निरीक्षक अर्जुन रजाने व त्यांचे सहकारी तातडीने घटनास्थळी दाखल झाले. शकीलने प्रथम पत्नी आणि दोन मुलांची विषारी औषध देऊन हत्या केली. आणि त्यानंतर स्वत: शकीलनेही आत्महत्या केल्याचे पोलीस तपासात निष्पन्न झाले आहे. मात्र या शकीलने हे कृत्य का केले याचे करण अद्यापही स्पष्ट झालेले नाही. तरी, पुढील तपास शिवाजी नगर पोलीस करीत आहेत.
