हडपसर, (पुणे) : पीएमपी बसमधून प्रवास करणाऱ्या एका महिला प्रवाशाच्या पर्समधून चोरट्यांनी सुमारे १ लाख ६५ हजार रुपयांचे सोन्याचे दागिने पळवून नेल्याची घटना नुकतीच उघडकीस आली आहे. रविवारी (ता. ०५) कात्रज ते गाडीतळ हडपसर प्रवासादरम्यान ही घटना घडली आहे.
याबाबत शेवाळवाडी (ता. हवेली) येथील एका महिलेने हडपसर पोलीस ठाण्यात अज्ञात व्यक्तीच्या विरोधात फिर्याद दिली आहे.
पोलिसांनी दिलेल्या माहितीनुसार, शेवाळवाडी (ता. हवेली) येथील महिला पीएमपी बसने कात्रज येथून हडपसरकडे या मार्गावर प्रवास करीत होती. यावेळी प्रवासादरम्यान रस्त्यात बसचा सीएनजी संपला. ज्यामुळे बस थांबल्याने काही प्रवासी खाली उतरले. त्यावेळी ही महिलाही बसमधून खाली उतरली. याच संधीचा फायदा घेत चोरट्याने या महिलेच्या पर्समधून सोन्याचे दागिने लंपास केले.
दरम्यान, चोरी झाल्याचे लक्षात येताच संबंधित महिलेने पोलिसांत धाव घेतली असून फिर्याद दाखल केली आहे. त्यावरून हडपसर पोलिसांनी गुन्हा दाखल केला आहे. या घटनेचा सखोल तपास हडपसर पोलिस करत आहेत.
