पुणे : भरधाव ट्रकने टेम्पो ट्रॅव्हलला धडक दिल्याने विचित्र अपघात होऊन चार वाहनांचा चक्काचूर झाल्याची घटना कात्रज बोगद्याजवळ दरी पूल पेट्रोल पंपापासून १०० मीटर अंतरावर घडली आहे. अपघातात सहा जण जखमी झाल्याची माहिती आहे. सुदैवाने यात कोणतेही जीवितहानी झाली नसून, वाहनांचे मात्र, मोठ्या प्रमाणात नुकसान झाले. अपघातानंतर ट्रक चालक फरार असून, याप्रकरणी सिंहगड पोलीस ठाण्यात अपघाताची नोंद करण्यात आली आहे.
मिळालेल्या माहिती नुसार, कात्रज बोगद्याजवळ दरी पूल पेट्रोल पंपाजवळ मुंबईच्या दिशेने येणाऱ्या भरधाव ट्रकने पुढे चाललेल्या टेम्पो ट्रॅव्हलला जोरदार धडक दिली. धडक इतकी जोरात होती की टेम्पो ट्रॅव्हलसह अन्य दोन वाहने पलटली. या अपघातात चार वाहनांचा चक्काचूर झाला. एकूण सहाजण जखमी झाल्याची माहिती आहे.
दरम्यान, या अपघाताची माहिती मिळताच सिंहगड पोलिसांनी तात्काळ घटनास्थळी धाव घेत बचावकार्य सुरु केले. सिंहगड पोलिसांनी अपघाताचा गुन्हा दाखल केला आहे. सर्व जखमी सातारा, पुणे, मुंबईतील रहिवासी आहेत. जखमींना उपचारासाठी नजीकच्या रुग्णालयात नेण्यात आले.
