पुणे : कचराकुंडी साफ न केल्याने पेंटरला लाकडी दांडक्याने बेदम मारहाण केल्याची धक्कादायक घटना दिघीममधील आळंदी रस्त्यावर रविवारी (ता.२६) घडली आहे. दिघी पोलीस ठाण्यात चौघांवर गुन्हा दाखल करण्यात आला आहे.
याप्रकरणी अमित सुधाकर दिक्षित (वय १९, रा.दिघी मूळ उत्तरप्रदेश) यांनी दिघी पोलीस ठाण्यात फिर्याद दिली आहे. त्यानुसार निलेश ओव्हाळ व त्याच्या ३ साथीदारांवर गुन्हा दाखल करण्यात आला आहे.
पोलिसांनी दिलेल्या माहितीनुसार, अमित दिक्षित हे एक पेंटर आहेत. दिक्षित हे काम करत असताना आरोपीने त्यांना कचराकुंडी साफ करण्यास सांगितली. यावेळी दिक्षित यांनी त्याला नकार दिला. यावेळी आरोपीने त्याच्या साथीदारांना बोलावून दिक्षित यांना लाथाबुक्क्या व लाकडी दांडक्याने बेदम मारहाण केली. दरम्यान, आरोपी निलेश याने दीक्षित यांच्या खिशातून १ हजार ४०० रुपये काढून घेतले आहे.
