शिरुर : पंधरा वर्षीय शाळकरी मुलीचा तिघा तरुणांनी विनयभंग केल्याची धक्कादायक घटना सनसवाडी (ता. शिरुर) येथे घडली आहे. याप्रकणी तिघांवर शिक्रापूर पोलीस ठाण्यात गुन्हा दाखल करण्यात आला आहे.
प्रितेश लिओ सदाफुले, शक्तिमान माणिक आडे, कृष्णा सुहास मीरेवाड (तिघे रा. कवठेमळा सणसवाडी, ता. शिरुर, जि. पुणे) असे गुन्हा दाखल करण्यात आलेल्या आरोपींची नावे आहेत. याप्रकरणी पिडीत मुलीच्या वडिलांनी फिर्याद दिली.
पोलिसांनी दिलेल्या माहितीनुसार, सणसवाडी (ता. शिरुर) येथील अल्पवयीन पंधरा वर्षीय मुलगी शाळेतून व क्लासवरुन घरी येत जात असताना आरोपींनी काही दिवस तिचा पाठलाग केला. त्यानंतर त्यांनी मुलीला थांबवून तिचा मोबाईल नंबर मागत मुलीचा हात पकडून तिच्या मनात लज्जा उत्पन्न होईल, असे कृत्य केले.
त्यानंतर मुलीने घरी जाऊन घडलेला सर्व प्रकार पालकांना सांगितला असता तिच्या पालकांनी याप्रकरणी शिक्रापूर पोलीस ठाण्यात फिर्याद दिली. त्यानुसार तिन्ही आरोपींविरोधात गुन्हा दाखल करण्यात आला आहे. या घटनेचा पुढील तपास पोलीस करीत आहेत.
