हडपसर : टेम्पो व दुचाकी यांच्यात झालेल्या अपघातात दोन महिन्यांपूर्वी लग्न झालेल्या पत्नीचा मृत्यू झाला तर पती गंभीर जखमी झाल्याची घटना घडली आहे. गुरुवारी (ता. २३) दुपारी साडेतीन वाजण्याच्या सुमारास वानवडी येथील नेताजीनगर परिसरात हि घटना घडली आहे.
पल्लवी सागर गोपी रेड्डी (वय २१, रा. साईनाथनगर, मुंढवा) असे अपघातात मृत्यू झालेल्या महिलेचे नाव आहे. सागर गोपी रेड्डी (२२, रा. मुंढवा, पुणे) हे अपघातात जखमी झाले आहेत. ट्रकचालक सोमनाथ राजमाने (वय ३६, रा. शिवणे) यांच्याविरोधात गुन्हा दाखल करण्यात आला आहे.
वानवडी पोलिसांनी दिलेल्या माहितीनुसार, पल्लवी रेड्डी व सागर रेड्डी यांचा दोन महिन्यांपूर्वी विवाह झाला होता. ते दोघे स्वारगेट येथे मित्राला भेटून मुंढवा येथे त्यांच्या राहत्या घरी दुचाकीवरून निघाले होते.
वानवडीतील नेताजीनगर कॉलनीच्या गेटसमोर पाठीमागून वेगाने आलेल्या ट्रकने धडक दिल्याने ते बाइकसह खाली पडल्याने त्यांच्या पत्नीच्या डोक्यावरून ट्रकचे चाक गेले. यात त्यांचा जागीच मृत्यू झाला.
दरम्यान जखमी पतीला ट्रकने फरपटत नेल्याने गंभीर दुखापत झाली. नागरिकांनी मदतीला धावून जखमी सागरला रुग्णालयात दाखल केले. या प्रकरणी वानवडी पोलिस ठाण्यात ट्रकचालकाविरोधात गुन्हा दखल करण्यात आला आहे.
