पुणे : बलात्काराच्या गुन्ह्याची दाखल केलेली केस मागे घे, नाही तर तुला खल्लास करुन टाकीन अशी धमकी एका महिलेला शिवाजीनगर न्यायालयातील कॅटीनमध्ये सहायक पोलीस निरीक्षकाने दिल्याची घटना उघडकीस आली आहे. त्यानुसार सहायक पोलीस निरीक्षकावर गुन्हा दाखल करण्यात आला आहे.
चंद्रकांत भगवान माने (वय ५३, रा. मधुबन सोसायटी, विजापूर रोड, सोलापूर) असे गुन्हा दाखल करण्यात आलेल्या सहायक पोलीस निरीक्षकाचे नाव आहे. चंद्रकांत माने हे सध्या सोलापूर येथील केगांव प्रशिक्षण केंद्रात कार्यरत आहे.
मिळालेल्या माहिती नुसार, , फिर्यादी आणि आरोपी हे एकमेकांच्या ओळखीचे असून, चंद्रकांत माने हा पुण्यात असताना त्याची फिर्यादी यांच्याशी ओळख झाली होती. त्यानंतर त्यातून त्याने त्यांच्यावर बलात्कार केला होता. याबाबत फिर्यादी यांनी २०२० मध्ये समर्थ पोलीस ठाण्यात फिर्याद दाखल केली होती. तसेच सोलापूर शहर पोलीस दलातील विजापूर नाका पोलीस ठाण्यात फिर्याद दिली होती.
त्याविरोधात चंद्रकांत माने याने उच्च न्यायालयात धाव घेतली आहे. चंद्रकांत माने याने १७ फेब्रुवारी रोजी फिर्यादी यांना फोन करुन शिवाजीनगर न्यायालयाच्या आवारातील कॅन्टिनमध्ये बोलावून घेतले. त्या तेथे पोहचल्यावर त्याने बलात्काराची फिर्याद मागे घे, नाही तर तुला खल्लास करुन टाकीन, माझी वरपर्यंत पोहोच आहे. तुझ्यामुळे हायकोर्टात केस पेंडिग पडली आहे, अशी धमकी देऊन शिवीगाळ केली.
दरम्यान, पिडीत महिलेने शिवाजीनगर पोलीस ठाण्यात फिर्याद दिली त्यानुसार चंद्रकांत माने यांच्यावर गुन्हा दाखल करण्यात आला असून या घटनेचा पुढील तपास पोलीस करीत आहेत.
