पुणे : हडपसर परिसरात दरोडा, खुनाचा प्रयत्न यांसारखे गंभीर गुन्हे दाखल असलेला कोयता गँगचा म्होरक्या स्वप्नील उर्फ बिट्या कुचेकरसह दोघांना हडपसर पोलीसांनी पाबळ (ता. शिरूर) येथील एका शेतात पाठलाग करुन बेड्या ठोकल्या आहेत. तर कोयता गँगमधील आणखी एकाला पाथर्डी (जि. नगर) परिसरातून अटक केली आहे.
कोयता गँगचा म्होरक्या स्वप्नील उर्फ बिट्या संजय कुचेकर (वय-२२ रा. मांजरी, हडपसर), पंकज गोरख वाघमारे (वय-२८ रा. बंटर स्कूलजवळ, हडपसर) अशी अटक करण्यात आलेल्या आरोपींची नावे आहेत.
हडपसर पोलीस ठाण्याचे वरिष्ठ पोलीस निरीक्षक अरविंद गोकुळे यांनी दिलेल्या माहितीनुसार, कोयता गँग मधील दोन जण पाबळ गावात येणार असल्याची माहिती पोलिसांना मिळाली होती. मिळालेल्या माहितीच्या अनुषंगाने पोलिसांनी आरोपींना पकडण्यासाठी तपास पथकातील पोलिस कर्मचारी निखिल पवार, समीर पांडुळे, शाहिद शेख, प्रशांत दुधाळ यांचे पथक तयार करून पाबळ येथे रवाना केले.
दरम्यान, आरोपींना पोलीस आल्याची चाहूल लागताच आरोपींनी उसाच्या शेतात पळून गेले. पोलिसांनी आरोपींचा उसाच्या शेतात पाठलाग करुन मोठ्या शिताफीने पकडले. कोयता गँगमधील आणखी एकाला पाथर्डी (जि. नगर) परिसरातून अटक केली आहे. वरील आरोपी हे सराईत गुन्हेगार आहेत. पुढील तपास हडपसर पोलीस करीत आहेत.
