पुणे : पुणे शहरात रिक्षा अन् दुचाकी चोरणाऱ्या चोरट्याला बंडगार्डन पोलिसांनी अटक केली आहे. पोलिसांनी त्याच्याकडून पावणे २ लाखाचा मुद्देमाल जप्त केला आहे. तर चोरट्याकडून तीन गुन्ह्यांची उकल करण्यास पोलिसांना यश आले आहे.
रफिक छोटू शेख (वय २१, रा. शिवनेरी नगर, गल्ली नंबर १८, कोंढवा) असे अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, बंडगार्डन पोलीस हद्दीत पोलीस गस्त घालत असताना, पोलिसांना एक इसम संशयास्पदरीत्या रिक्षा घेऊन फिरत असल्याचे निदर्शनास आले. त्यावरून पोलिसांनी रफिक याला ताब्यात घेतले. त्याच्याकडे असलेल्या रिक्षाबाबत चौकशी केली असता, ही रिक्षा चोरीची असल्याचे समोर आले.
पोलिसांनी आरोपी रफिक शेख याला ताब्यात घेऊन अधिक चौकशी केली असता, आरोपीने बंडगार्डन, कोंढवा व निगडी पोलीस ठाण्याच्या हद्दीतील प्रत्येकी एक असे ३ गुन्हे केल्याची पोलिसांना कबुली दिली आहे. पोलिसांनी आरोपीकडून दोन रिक्षा व एक दुचाकी असा सुमारे १ लाख ८० हजारांचा मुद्देमाल जप्त केला आहे.
