यवत : यवत पोलीस ठाण्याच्या हद्दीत शनिवारी (ता. २३) दौंड तालुक्यातील यवत, पाटस, राहू, येथील तिघांनी आत्महत्या केल्याची माहिती यवत पोलीस ठाण्याचे वरिष्ठ पोलीस निरीक्षक नारायण पवार यांनी दिली.
सुभाष नानासाहेब दोरगे (वय-४५, यवत, ता. दौंड), धंनजय दत्तात्रय शितोळे ( वय-४८, रा. पाटस, ता. दौंड), संजय सोपान तांबे (वय-३५, रा. राहू, ता. दौंड) अशी आत्महत्या केलेल्या तिघांची नावे आहेत.
पोलीस निरीक्षक नारायण पवार यांनी दिलेल्या माहितीनुसार, यवत येथील सुभाष दोरगे हे शनिवारी सकाळी आठ वाजण्याच्या सुमारास खुटबाव रेल्वे रूळावर रेल्वेखाली आत्महत्या केल्याची घटना घडली. आत्महत्या का केली याचे कारण अद्याप अस्पष्ट आहे.
पाटस येथील धंनजय शितोळे यांनी राहत्या घरामध्ये साडीच्या सहाय्याने गळफास घेऊन आत्महत्या केली.
दरम्यान, राहु येथील संजय तांबे यांनी रविवारी (ता. १०) राहत्या घरी विषारी औषध प्राशन केले. त्याला उपचारासाठी पुणे येथील ससून रुग्णालयात दाखल करण्यात आले होते. शनिवारी त्यांचाहि उपचारादरम्यान मृत्यु झाला आहे. तिघांच्याही आत्महत्येचे कारण अद्याप समजू शकले नाही. तपास यवत पोलीस करीत आहेत.
