पुणे : तळेगाव ढमढेरे येथे सोन्याच्या दुकानात घुसून एका अज्ञात व्यक्तीने वृद्ध दाम्पत्यावर खुनी हल्ला करत जखमी केल्याची घटना सोमवारी (दि. २३) सायं. साडे सातच्या दरम्यान घडली.
महेंद्र जयंतीलाल शहा, सरिता शहा असे हल्यात जखमी झालेल्या दाम्पत्यांची नावे आहेत. याप्रकरणी राहुल महेंद्र शहा यांनी शिक्रापूर पोलिस ठाण्यात फिर्याद दिली आहे. त्यानुसार एका अज्ञात व्यक्तीवर गुन्हा दाखल करण्यात आला आहे.
पोलिसांनी दिलेल्या माहितीनुसार, सोमवारी (ता.२३) सायंकाळी ७.३०च्या दरम्यान मालक महेंद्र जयंतीलाल शहा व त्यांची पत्नी सरिता शहा या दुकान बंद करत होत्या. या वेळी दुकानच्या छोट्या प्रवेशद्वारातून अज्ञात व्यक्तीने आत येऊन शहा दाम्पत्यावर कोणत्यातरी हत्यारसदृश्य वस्तूने मारहाण केली. यामध्ये सरिता शहा गंभीर जखमी झाल्या.
यावेळी दोघांनी आरडाओरडा केला त्यांच्या आवाजाने शेजारी नागरिक जमा होऊ लागले. त्यामुळे अज्ञात हल्लेखोर दुकानच्या मागील बाजूस असणार्‍या कुलूपबंद दरवाजाची किल्ली घेत पसार झाला. विशेष म्हणजे यामध्ये दुकानात असणारा ऐवज, वस्तू, पैसे चोरीला गेलेले नाही.
दरम्यान, या घटनेची माहिती मिळताच शिक्रापूरचे पोलिसांनी घटनास्थळी धाव घेतली. या घटनेत सोनाराचे दुकान असूनही कोणताही ऐवज, वस्तू, पैसे चोरीला गेले नाहीत. यावरून पूर्ववैमनस्यातून हा प्रकार घडला असल्याचा प्राथमिक अंदाज पोलिसांनी वर्तविला असून या घटनेचा पुढील तपास पोलीस करत आहेत.
