पुणे : स्वातंत्र्याच्या अमृत महोत्सवानिमित्त तुरुंगातील चांगली वर्तणूक असलेल्या राज्यातील वेगवेगळ्या तुरुंगांमध्ये शिक्षा भोगत असलेल्या १८९ कैद्यांची केंद्र सरकारच्या निकषानुसार तुरुंग प्रशासनाने निवड केली आहे. प्रजासत्ताक दिनी या कैद्यांची तुरुंगातून सुटका करण्यात येणार आहे. तसेच काही निकषांमध्ये येणाऱ्या कैद्यांच्या शिक्षेत विशेष माफी देण्याचा निर्णय केंद्र सरकारने घेतला आहे.
देशभरात स्वातंत्र्याच्या अमृत महोत्सवानिमित्त वेगवेगळे कार्यक्रम आणि उपक्रम राबविले जात आहेत. त्याचाच एक भाग म्हणून कैद्यांनाही शिक्षेमध्ये विशेष माफी देण्याचा निर्णय घेण्यात आला आहे. सोडण्यात येणाऱ्या कैद्यांमध्ये कुणाचा समावेश करावा यासाठी केंद्र सरकारच्या वतीने काही निकष तयार करण्यात आले आहेत.
शिक्षेच्या कालावधीपैकी ५० टक्क्यांहून अधिक कालावधी पूर्ण केलेल्या ५० वर्षांपेक्षा अधिक वयाच्या महिला कैदी, शिक्षेच्या कालावधीपैकी ५० टक्क्यांहून अधिक कालावधी पूर्ण केलेल्या ५० वर्षांपेक्षा अधिक वयाचे तृतीयपंथी कैदी, ५० टक्क्यांपेक्षा शिक्षेचा कालावधी पूर्ण केलेले ६० वर्षांवरील पुरुष कैदी, ७० टक्क्यांपेक्षा अधिक अपंगत्व असलेले आणि शिक्षेचा निम्मा कालावधी पूर्ण केलेले कैदी, गंभीर आजाराने ग्रस्त, शिक्षेचा ६६ टक्यांपेक्षा अधिक कालावधी पूर्ण केलेले कैदी यांचा समावेश विशेष माफीसाठी करण्यात यावा, असे निकष केंद्र सरकारने निश्चित केले होते. शिक्षा पूर्ण केली आहे.
दरम्यान, दंडाची रक्कम भरता येत नसल्याने तुरुंगात आहेत, तसेच १८ ते २१ वयोगटातील कैदी जे अपघाताने गुन्ह्यात अडकले असून, त्यांनी पुन्हा गुन्हा केला नाही अशांनाही विशेष माफीसाठी ग्राह्य धरण्यात यावे, असे केंद्र सरकारने सूचित केले होते.
