पुणे : सातत्याने पाठलाग करुन बस प्रवासात धक्का मारुन अल्पवयीन मुलीचा विनयभंग करणार्‍या माथेफिरूला कोथरुड पोलिसांनी बेड्या ठोकल्या आहेत.
प्रेम चंदू पवार (वय २९, रा. पिरंगुट पोलीस चौकीशेजारी, घोटावडे फाटा) असे अटक करण्यात आलेल्या व्यक्तीचे नाव आहे. याप्रकरणी भुसारी कॉलनीत राहणार्‍या एका १६ वर्षाच्या अल्पवयीन मुलीने कोथरुड पोलीस ठाण्यात फिर्याद दिली आहे.
पोलिसांनी दिलेल्या माहिती नुसार, पिडीत तरुणी ही नेहमी नळस्टॉप वरुन बसने रात्री घरी जाते. गुरुवारी (ता. १२) रोजी ती बसने घरी जात असताना पवार याने बस प्रवासादरम्यान तिच्यासोबत बोलण्याचा बहाणा करून माझ्यासोबत मैत्री करशील का असे विचारले. त्यानंतर तिची इच्छा नसताना तिचा हात हातात घेऊन तुला उद्या माझ्याकडून चहाची पार्टी देतो, असे म्हणाला.
दरम्यान, शनिवारी (ता. १४) रोजी रात्री पिडीत बसने प्रवास करीत असताना तो पाठलाग करत बसमध्ये आला. त्याने तिला धक्का मारुन वेगवेगळे हातवारे करुन तिचा विनयभंग केला. या घटनेची माहिती पिडीतने आपल्या घरच्यांना सांगितली.
त्यानंतर या प्रकरणी पिडीत तरुणीने कोथरुड पोलीस ठाण्यात फिर्याद दिली. त्यानुसार प्रेम चंदू पवार याला पोलिसांनी अटक केली असून या घटनेचा पुढील तपास पोलीस करीत आहे.
