पुणे : दिघी पोलीस ठाण्यात चक्क तरुणाचा मृतदेह ठेवून नातेवाईकांनी ठिय्या आंदोलन केल्याची धक्कादायक घटना नुकतीच उघडकीस आली आहे. तसेच पोलीस कर्मचाऱ्यांच्या दबावामुळे तरुणाचा हृदय विकाराच्या झटक्याने मृत्यू झाला आहे, असा आरोपही तरुणाच्या नातेवाईकांनी पोलिसांवर केला आहे.
वृषभ मुकुंद जाधव असे हृदय विकाराच्या झटक्याने मृत्यू झालेल्या तरुणाचे नाव आहे.
मिळालेल्या माहितीनुसार, वृषभ जाधव व त्याच्या पत्नीमध्ये वादविवाद झाले होते. या दोघांमधील वादविवाद हे घटस्फोटापर्यंत गेले. आणि त्यांची घटस्फोटाची केस न्यायालयात सुरू होती. या घटस्फोटाचा निकाल वृषभ जाधव यांच्या विरोधात लागला होता.
दरम्यान, पोलिसांनी वृषभ जाधव याच्या घरी येऊन दबाव टाकला होता. या दबावामुळेच त्याला हृदय विकाराचा झटका येऊन त्याचा मृत्यू झाला आहे. असा आरोप वृषभच्या नातेवाईकानी पोलिसांवर केला आहे. तसेच ज्या पोलिसांनी वृषभ जाधववर दबाव टाकला. त्यांच्यावर कठोर कायदेशीर कारवाई करण्यात यावी. अशी मागणी वृषभच्या नातेवाईकांनी केली आहे.
