पुणे : पुण्यातील वानवडी येथे पूर्ववैमनस्यातून अल्पवयीन मुलाचा खुन करण्यात आल्याची घटना ताजी असताना आता सिंहगड रोड परिसरातील चरवड वस्ती येथे आणखी एका अल्पवयीन मुलाचा चॉपरने सपासप वार करुन खुन केल्याचा धक्कादायक प्रकार समोर आला आहे. येता जाता आमच्याकडे का पाहतो, या कारणावरुन पूर्वी झालेल्या भांडणाच्या रागातून तिघा अल्पवयीन मुलांनी एका १७ वर्षाच्या मुलाचा खुन केल्याची घटना घडली आहे.
सिंहगड रोड परिसरातील चरवड वस्ती येथे मंगळवारी रात्री सव्वा अकरा वाजण्याच्या सुमारास घडली आहे. श्रीपाद अनंता बनकर (वय-१७) असं खुन करण्यात आलेल्या मुलाचे नाव आहे. याप्रकरणी सिंहगड रोड पोलिसांनी तिघा अल्पवयीन मुलांवर खुनाचा गुन्हा दाखल करून त्यांना ताब्यात घेण्यात आले आहे.
पोलिसांनी दिलेल्या माहितीनुसार, श्रीपाद बनकर हा शिक्षण घेत होता. त्यांच्याच वस्तीतील तीन चार मुलांशी त्याची यापूर्वी भांडणे झाली होती. जाता येताना एकमेकांकडे का पाहतो, या कारणावरुन त्यांच्यात भांडणे झाली होती. याचाच राग मनात धरुन तीन अल्पवयीन मुलांनी श्रीपाद बनकर याच्यावर चॉपरने सपासप वार करुन त्याचा खुन केला. याप्रकरणी सिंहगड रोड पोलिसांनी खुनाचा गुन्हा दाखल करुन तीन अल्पवयीन मुलांना ताब्यात घेतले आहे. या प्रकारांचा अधिक तपास सिंहगड रोड पोलिस करत आहेत.
वनावडीत दोघांकडून कोयत्याने वार करून १७ वर्षीय तरुणाची हत्या..
दरम्यान, वानवडी भागातील एका १७ वर्षीय तरुणाचे काही महिन्यांपूर्वी दोघांसोबत भांडण झाले होते. तो राग मनात धरून दोघांनी कोयत्याने तरुणावर सपासप वार केले. या घटनेमध्ये तरुणाचा मृत्यू झाला आहे. या प्रकरणी दोन आरोपींना पोलिसांनी अटक केली आहे. यश सुनील घाटे वय १७ असे खून झालेल्या तरुणाचे नाव आहे.
