पुणे : हडपसरजवळील मांजरी परिसरात पूर्ववैमनस्यातून झालेल्या भांडणातून गुंडांच्या टोळक्याने दहशत माजवून एका तरुणावर कोयत्याने हल्ला केला. याप्रकरणी सहा जणांविरुद्ध खुनाचा प्रयत्न केल्याप्रकरणी गुन्हा दाखल करण्यात आला आहे. अक्षय म्हस्के, प्रेम ऊर्फ रावण, सोनू महाकाल, प्रतीक चोरडे, सौरभ इंगळे, स्वप्नील महाकाल (सर्व रा. गुरुकृपा सोसायटी, केशवनगर, मुंढवा) ही संशयित आरोपींची नावे आहेत.
यासंदर्भात करण मुकेश मेमजादे (वय २३, रा. कमल कॉलनी, गोडबोलेवस्ती, मांजरी) याने हडपसर पोलीस ठाण्यात फिर्याद नोंदवली आहे. मांजरी परिसरातील जी मॉल परिसरात मेमजादे, त्याचे मित्र सुजल भिसे, सूरज चौधरी, प्रतीक शिंदे, तेजस ऊर्फ सोन्या पायगुडे थांबले होते. त्यावेळी आरोपी म्हस्के आणि त्याच्या साथीदारांनी त्यांच्यावर कोयत्याने हल्ला चढवला. त्यामध्ये ते जबर जखमी झाले.
