पुणे : सिंहगडावर जाणाऱ्या पर्यटंकासाठी एक महत्वाची बातमी आहे. सिंपल स्टेप्स फिटनेस या संस्थेतर्फे सिंहगड किल्ला येथे १४ व १५ डिसेंबरला रन इव्हेंट मॅरेथॉन स्पर्धा आयोजित करण्यात आली आहे. या वेळी वाहतूक कोंडी होऊ नये तसेच कायदा व सुव्यवस्था अबाधित रहावी यासाठी १४ व १५ डिसेंबर रोजी सिंहगडावर जाणारी वाहतूक पूर्णपणे बंद ठेवण्याच्या सूचना जिल्हाधिकारी डॉ. सुहास दिवसे यांनी दिल्या आहेत.
रन इवेंट मॅरेथॉन स्पर्धेमध्ये ४०० धावपटूंसह मार्गदर्शक, स्वयंसेवक व प्रेक्षक वर्ग मोठ्या प्रमाणात सहभागी होणार असल्याचे पोलिस अधीक्षक पुणे ग्रामीण यांनी कळविले आहे. त्यामुळे सिंहगड घाट रस्ता मार्गात वर्दळ व गर्दा मोठ्या प्रमाणात वाढण्याची शक्यता असल्याने तसेच सुरक्षिततेच्या दृष्टीने सिंहगड घाट वाहतूक पूर्णपणे बंद ठेवण्याचे आणि वाहतूक पर्यायी मार्गाने वळविण्यात आली आहे. दरम्यान, अत्यावश्यक सेवेतील वाहनांना ही बंदी लागू राहणार नसल्याचे आदेशात नमूद करण्यात आले आहे.
असे असतील पर्यायी मार्ग?
- हवेली पोलिस ठाणे हद्दीतून गोळेवाडी मार्ग घाटरस्ता मार्गे खेड-शिवापूर येथे जाणाऱ्या रस्त्यावरील सर्व प्रकारची वाहतूक पूर्णपणे बंद ठेवण्यात येणार आहे.
- डोणजे-खडकवासला-वडगाव धायरी मार्गे नवीन कात्रज बोगदा येथून खेड शिवापूर येथे पर्यायी मार्गान वाहनचालकांना जाता येईल.
- राजगड पोलिस ठाणे हद्दीतून कोंढणपूर येथून घाटरस्ता मार्गे सिंहगड किल्ला- गोळेवाडी येथे येणारा रस्ता पूर्णपणे बंद राहणार
- वाहनचालकांना डोणजे गावाकडे जाण्याकिरता खेड शिवापूर-शिंदेवाडी-नवीन कात्रज बोगदा या पर्यायी मार्गेने वडगाव धायरी येथून खडकवासला डोणजे मार्गे गोळेवाडीकडे जावे.
