पिंपरी : शासनाने प्रतिबंधित केलेला गुटखा, पानमसाला विक्रीसाठी ठेवल्याने पोलिसांनी एकाला अटक केली आहे. त्याच्याकडून ४० हजार ९२५ रुपयांचा गुटखा, पानमसाला जप्त करण्यात आला आहे. आळंदी येथील गजानन महाराज मंदिरासमोर मंगळवारी (दि. १२) ही कारवाई करण्यात आली. माधव वैजनाथ कुंडगीर (वय ३८, रा. आळंदी, देहूफाटा) असे अटक केलेल्या आरोपीचे नाव आहे. या प्रकरणी पोलिस शिपाई बाबाजी मारुती जाधव यांनी दिघी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आळंदी येथील गजानन महाराज मंदीरासमोर एका दुकानात प्रतिबंधित गुटखा विक्री होत असल्याची माहिती दिघी पोलिसांना मिळाली. त्यानुसार पोलिसांनी छापा मारून पाहणी केली असता शासनाने प्रतिबंधित केलेला ४० हजार ९२५ रुपयांचा गुटखा, पानमसाला विक्रीसाठी साठवूण केल्याचे आढळले. पोलिसांनी सर्व माल जप्त करत आरोपीला अटक केली. दिघी पोलिस तपास करत आहेत.
