पुणे : खडकवासला विधानसभा मतदारसंघातील जवळपास २७ मतदान केंद्रे मतदारांच्या सोयीच्या दृष्टीने स्थलांतरित करण्यात आली आहेत. यामध्ये मतदारांना सहज पोहोचता यावे, गर्दीची समस्या टाळावी, तसेच काही शाळांची इमारत जीर्ण झाल्यामुळे अशा विविध कारणांनी मतदान केंद्रांचे ठिकाण बदलले गेले आहे.
या बदलांमुळे काही केंद्रे १०० मीटर, काही ५०० मीटर तर काही ठिकाणी १.५ किलोमीटर अंतरावर स्थानांतरित झाली आहेत. मतदारांना नवीन मतदान केंद्रांची माहिती वेळेवर मिळावी म्हणून जुन्या मतदान केंद्राच्या ठिकाणी नवीन केंद्राची माहिती असलेले फलक लावण्यात येणार आहेत. निवडणूक निर्णय अधिकारी डॉ. यशवंत माने, किरण सुरवसे आणि सचिन आखाडे, अंकुश गुरव यांनी ही माहिती दिली आहे.
