पुणे : मराठी चित्रपटसृष्टीमध्ये सतत वेगवेगळ्या विषयांवर आधारित चित्रपट प्रेक्षकांच्या भेटीला येताना दिसतात. त्यामध्ये दिग्दर्शक हेमंत ढोमेच्या चित्रपटांना प्रेक्षकांची चांगली पसंती असल्याचे पाहायला मिळते. अशातच अभिनेता-दिग्दर्शक हेमंत ढोमेने दिवाळीच्या मुहूर्तावर नव्या चित्रपटाची घोषणा केली आहे. दिग्दर्शक हेमंत ढोमेने आता ‘फसक्लास दाभाडे’ हा चित्रपट घेऊन प्रेक्षकांच्या भेटीला येणार आहे. तर दिवाळीच्या शुभ मुहूर्तावर या चित्रपटाचे नवीन पोस्टर प्रदर्शित करण्यात आले असून चित्रपटाच्या प्रदर्शनाची तारीख जाहीर केली आहे.
अभिनेता-दिग्दर्शक हेमंत ढोमेने पोस्ट शेअर करत लिहिलयं की, “आपल्या फसक्लास दाभाडे कुटूंबाकडून आपल्याला व आपल्या कुटूंबाला दिपावलीच्या फसक्लास शुभेच्छा! झिम्माच्या टीमचा नवा सिनेमा ‘फसक्लास दाभाडे’ 24 जानेवारीपासून तुमच्या जवळच्या फसक्लास चित्रपटगृहात!”
दिवाळीच्या शुभ मुहूर्तावर चित्रपटाचे नवीन पोस्टर आणि प्रदर्शनाची तारीख सोशल मीडियावर जाहीर करण्यात आली आहे. हा चित्रपट 24 जानेवारी 2025 रोजी चित्रपटगृहात प्रदर्शित होणार असून अमेय वाघ, क्षिती जोग, सिद्धार्थ चांदेकर यांच्यासह निवेदिता सराफ, हरिष दुधाडे, राजन भिसे, राजसी भावे यांच्याही प्रमुख भूमिका आहेत.
चित्रपटाच्या पोस्टरमध्ये कुटुंब एकत्र येऊन दिवाळी साजरी करताना दिसत आहे. त्यामुळे हा चित्रपट संपूर्ण कुटुंबाचं मनोरंजन करणारा ठरणार आहे. सगळ्यात महत्त्वाचं म्हणजे हेमंत ढोमेचे चित्रपट हलक्या-फुलक्या पद्धतीनं काहीतरी संदेश देणारे असतात. एखादा संवेदनशील विषयाला उत्तमरित्या हाताळण्याची तो कमाल आहे. त्यामुळे हा चित्रपटही काहीतरी हटके असणार, हे नक्की!
दरम्यान, अभिनेता-दिग्दर्शक हेमंत ढोमेंच्या यापूर्वीच्या ‘झिम्मा’, ‘झिम्मा 2’ चित्रपटांनी प्रेक्षकांचं मन जिंकून घेतलं आहे. त्यामुळे या नव्या चित्रपटाकडून प्रेक्षकांना प्रचंड अपेक्षा आहेत.
View this post on Instagram
